«Дагестанская правда» газетала редакциялизиб «Литературная газетала» 34 эсил бекI редактор Максим Замшев ДР-ла СМИ-бала вакилтачил гьуниваиб. Нушала республикализи ил вакIнила мурад сабри жагьти писательтала лебил Россияла семинарличир бутIакьяндеш дарни. Балбуцла дазурбазир редактортачил ва журналистуначил литература, газетаби-журналти ва арагIебли журналистика гьаладяхI дашахънила масъулти хIердариб.

М.Замшевли бахъхIила газеталичила тамашала баянти дуриб. 1830 ибил дусличибад А.Пушкинна ва А.Дельвигинна бекIдешлиуб дурайуси буили саби «Литературная газета». Ит манзилла гьаркьяти произведениеби кадирхъуси ил, къияндешуни акIни багьандан, дусра байхъалара дикибхIели, гIекIибсири.
Газетала тарихлизиб 1929 ибил дус сагаси бутIали бетаур. М.Горькийли газета сагадан «мицIирбарахъес» ибси пикри гьалабихьиб. ИтхIейчибад «Литературная газета» СССР-ла поэтунани ва писательтани чула кьалам «бугабикIахъуси» майдай бетаур.
«ИтхIелла газетабачи хIерикIухIели, илала бя­хIя­назиб политикала бяст чебаэсли саби. ГIяхIцад машгьурти писательтас чула произведениеби ил газетализи кадирхъули дигусири. Журналистуни ва поэтуни алкIниличи хIукуматлира хIеруди бузахъусири. Буралли, хIукумат автортала пикриличи лехIирхъусири», — викIи М.Замшев.
1962 ибил дуслизиб «Литературная газетала» бекI редакторли вирусири А.Чайковский. Илини газета гIяхIцадла гьалабяхI арбукибсири.
«Дагъистаннизи дакIниличил бархбасахъи, хIу­ша­ла литератураличи нушани халаси пикри бяхI­чииъ­ни­личилара бурес дигулра. Нушала «Многоязыкая ли­ра России» бикIуси хасси проект леб, сунезира миллатла писательтала урус мезличи шурдатурти про­из­ве­де­ниеби кадирхъуси. Ил проект нушани гIуррара даим­би­рехIе», — викIи «Литературная газетала» бекI редактор.
Балбуцличир литературала даража гIяхIбухъахъ­ниличилара гъай детаур. «Газетаби-журналти «дубкI­нила»» хIекьлизибси темала чебкад, илди гьачамлис «хIяридихьес» жявли саби или багьахъур балбуцла бутIакьянчибани.
БусягIятла замана «Литературная газета» жагьти писательтас ва поэтунас бекIлибиубси майдай кавлули саби, цацахIели илдала творчество цархIилталайзибад декIарбулхъули биалра.
«Газетали цацун пикри гьалабирхьалли, бегIлара бархьси биалра, учIаннис ил хъярхъли биртIур. Газета декIар-декIарти пикруми гьаладирхьуси трибунали биахъес гIягIниси саби. Иличибли газетали хIурмат ва сагати гьалмагъуни сарху», — аргъахъиб М.Замшевли.