«Дагъистан» РИА-лизиб ЖКХ-ла объектуни яниличи хIядурли диънила ва топливно-энер­гетический комплексла (ТЭК) бузери гIяхI­бухъахъ­ни­лашалти далдуцуни дурадеркIнила хIекьлизибси балбуц (брифинг) бетерхур.

Балбуцла бутIакьянчиби ДР-ла ЖКХ-ла уп­рав­ле­ниела начальник Мавлуд Мусаевли, рес­публикала ЖКХ-ла начальникла заместитель Мя­хIям­­мад Салимгереевли ва «Россети Северный Кавказ» ПАО-ла «Дагэнерго» филиалла бекI­ли­виуб­сигъуна инженер МяхIяммад Ханапиевли ванадеш гIеббурцути газла ва хутIла объектунала даражаличила багьахъур.
Объектуначила гъайикIули, илди яниличи 97 процентла кьадар хIядурли диъниличила буриб М.Мусаевли. Илкьяйдали илини республикала жа­ми­гIятла ва гIямрула шуртIри гIердурцути гIяхIцад объек­туни дуркьдиъниличилара гьанбушиб. Буралли, ил­ди Совет хIукуматла манзил делшунти сари ва объек­туни сагадирнила хIянчи дурадеркIес хIяжатли са­ри.
БусягIятла манзиллис республикала 9 шагьарлис яниличи хIядурли диънила паспортуни дедили сари.
Республикала газла кьяли яниличи хIядурбиънила шайчибси суаллис жаваб лугули, М.Салимгереевли Да­гъистанна сагати шими-шагьурти газличил гIер­ду­цнила хIекьлизибси халаси кьадрила прог­рамма гIямрулизиб дураберкIили бирар или багьахъур. Илини буриливан, гьанна, улкала Президентла хъар­баркь хIясибли, бекIахъудила объектуни газличил гIер­дуцнила хIянчи детурхули сари. Илкьяйдали рес­пуб­ликала газ буртIути линияби дуркьдиъниличил дарх­дасунти масъулти алкIниличилара аргъахъиб.