Ишди бурхIназиб МяхIячкъалализибси «Россия – моя история» бикIуси тарихла музейла юртлизиб «Дагъистан Республика социальный бяхIчибизла-экономикала шайчиб гьалабяхI башахъни» бикIуси конференция бетерхур. Ил ДР-ла БекIла къуллукъуни заманалис дузахъуси С.Меликовла бекIдешлиуб дураберкIибсири.
Конференцияла дазурбазиб Дагъистан 2024 ибил дусличи ва план хIясибли 2030 ибил дусличи бикайчи социальный бяхIчибизла-экономикала шайчиб гьалабяхI башахънила проектла бекIлидиубти шалубачила багьахъур.
Балбуцлизир бутIакьяндеш дариб ДР-ла Правительствола Председатель ГI.Амирхановли, РФ-ла экономикала ва мер-муса гьаладяхI дашахънила Министерствола СКФО социальный бяхIчибизла-экономикала шайчиб гьалабяхI башахъуси Департаментла директор И.Храновскийли, муниципалитетунала бургани, гIилмула хIянчизартани.
Дагъистан 2024 ибил дусличи ва план хIясибли 2030 ибил дусличи бикайчи социальный бяхIчибизла-экономикала шайчиб гьалабяхI башахънила проектличила балахъули, Сергей Меликовли арзес гIягIнити гьалар-гьаларти масъулти ва сархес хIяжатти мурадуни тIашдатес чебиркниличила буриб, чулира Дагъистанна гьарил хъалибаргла гIямрула даража чебаэсли ункъбиахъести.
«Нушала бекIлибиубси мурад республика Россияла Федерацияла экономика ахъси даражаличибти регионтас гIеббаахъни саби, республикалис хIяжатти инвестицияла проектуни дурадеркIили ва цархIилти тяхIуртира далдурцули. Дагъистан Россияла гьаркьятигъунти регионтала даражаличи абикахъести имканти дахъал лер. Илис биалли, лерилра масъулти гьаргли ва сари лертиван жамигIятла хIяракатчибачил, вачар-чакар дузахъутачил ва гIялимтачил дарх хIердирес гIягIнибиркур.
Цаибилгъуна мурад 2024 ибил дусличи бикайчи адамтала гIямрула шуртIри ункъдарахъни саби. Ил масъала гьунчибушес диахIелли, 2030 ибил дусличи бикайчи Дагъистан гьарли-марли цархIил даражаличи дурабулхъан», — цIакьбарили буриб С.Меликовли.
Дагъистан 2024 ибил дусличи ва план хIясибли 2030 ибил дусличи бикайчи социальный бяхIчибизла-экономикала шайчиб гьалабяхI башахънила проект чебаахъиб ДР-ла экономикала ва мер-муса гьаладяхI дашахънила Министерствола гьалабси ЖамигIятла советла член, Стратегия—2030 акIахъубси Бузерила кьукьяла член Маир Пашаевли. Сунела докладлизиб илини проектла хасдешуначила буриб.
Дагъистаннизиб туризм гьалабяхI башахъниличила гъайухъун ДР-ла туризмала шайчивси министрла къуллукъуни заманалис дузахъуси Эмин Мерданов. «Нушаб 2030 ибил дусличи бикайчи республикализи башути туристунала лугIи 2,2-нали халабиахъес ва туризмала кьялилизиб бузутала лугIи 1,8-нали халабиахъес гIягIнили саби. Ил багьандан Стратегия-2030 проектлизи нушани республикала 5 мер-муса кадерхахъурлира, сарира туристунас хаслира гIяхIдилзути ва илди мерани гьаладяхI дашахъести гьундурира пикридарилра», —викIи Э. Мерданов.
Балбуц ахирличи биркахъули, Дагъистанна БекIла къуллукъуни заманалис дузахъуси Сергей Меликовли конференция хIядурбарибтас ва илизир бутIакьяндеш дарибтас баркалла багьахъур.
«Республика гьалабяхI башахънила масъала иличи авараагарли хIерхIебикIути-ургаб ихтилатбирни, чараагарси саби», — таманбариб буруси регионна БекIли.
Стратегия—2030 документличил тянишдиэс дирудая ДР-ла экономикала ва мер-муса гьаладяхI дашахънила Министерствола сайтличир. Ил шел бутIализибад цалабикибси саби. Документла черкадти хIушала пикруми яра ил чеункъбиахъести насихIятуни 2021 ибил дусла октябрьла 11-личи бикайчи, гIергъиси электронный адрес хIясибли, кьабулдирути сари: minec@e-dag.ru.
