МугIяллим. Сецад мягIна бухIнабуцилил ил девли. Гьарил адамлис ил декIарси рангличилсили бетарар. Къугъали ихтилатикIес балуси, халаси сабурличилси, мурхьти багьудлумачилси адам мугIяллим ветарар. МугIяллимла санигIят хIурматла ва дебали тамашаласи саби. Илини дурхIни халатала гIямрулизи абацIахъес кумекбиру, илди хIурматбирутили, дигичебтили, рухIлашал давлачебтили бяркъес хIяракат дакIубиру.
МугIяллимла санигIят инсаниятличил барх акIубси саби викIалра, хатIа бетхIерар. БегIлара цаибти санигIятуни дакIудухъунхIейчирад, касибти устадеш ва багьудлуми наслубачирад-наслубачи диахъули, ишбархIира пайдаладирули сари.
МугIяллимла дебали къиянси, халати жавабкардеш дихуси санигIят саби. Илини пасихIси, санигIятлис марси, бархьдеш дигахъуси виахъес тIалаббирули саби.
МугIяллимли дурхIнала хIурмат сархни дебали мягIничебси масъала саби. Ил секьяйда сархес вирара? МугIяллим вегIла баркьудиличи ва дурхIначи дигичевсили виэс гIягIнибиркур, илкьяйдали илис мурхьти багьудлумачилси, санигIят ункъли бяркъурси, даим гьалавяхI вашусили виэсра чебиркур. ДурхIни багьудлумачи бегIбарес илцад-декIарли гьамадси баркьуди ахIен. МугIяллимла кьиматчебдеш сай багьудлумачилси виънилизибцун ахIенну, сунени кабирхьуси дарс дурхIнази иргъахънилизиб саби.
МугIяллимла санигIят — мурадличи биути, цархIилти багьудлумачи бегIбарес бажардибиркути, илдази устадеш гIерасахъес бирути адамтани биркIуси санигIят саби. ДурхIни чихъти адаб-хIяяла къиликъуначилти бетаахъес багьандан, мугIяллимли гьар бархIи халаси къайгъи дакIубируси саби.
ХIурматчевси, пикриикIес балуси адам вяркъни ва багьудиличил вегIварни мугIяллимла бекIлибиубсигъуна мурад саби ва гьаннала жамигIят гьалабяхI башнилизиб ил цаибил шартIли бетарули саби. Россияла челябкьла, илала сархибдешуни багьудичебти адамтазибад, илди ахъанайтачи баэс гьуцIбикIнилизибад дигахъути сари.
Чесабиуси санигIятлашалси байрамличил бархбасахъи, лебилра мугIяллимти уркIи-уркIилабад мубаракбарес дигулра. ХIушаб къаркъаван чIумаси арадеш, кахIедурхути цIакьани, уркIила малхIямдеш, илкьяйдали белчIудиличи гъирачебти дурхIни, хIушала бузерилизир сархибдешуни дулгулра.
