ХIера, чумал бархIи дикиб нушала улкала халкьли сагаси Пачалихъла Думала депутатуни чеббикIили гIергъи.
Россиялизиб хIербирути избирательтала 51,72 процент выбортачи бакIиб. Бахъалгъунтани, Избиркомла баянти хIясибли, «Цаси Россия» партиялис чула тIамри дедиб. ТIамрала 49,82 процент илдани сархили сари.
Пачалихъла Думализи ардякьунти лерилра партиябала вакилти Россияла Президентличил къаршибикиб ва чула пикрумачила багьахъур. Буралли, Пачалихъла Думализи сагаси партияра бухIнабухъун – «Новые люди» бикIуси. Илини 5 процентличирра имцIали тIамри сархиб. Гьалабра лебти бахъалгъунти депутатуни гьанна сагадан чеббикIиб.
Илкьяйдали нушала республикала Халкьла Собраниелизира выборти детерхуртири. Ишабра «Цаси Россия» партия гьалабикиб. Депутатунала ургабра халаси-декIар барсдеш хIебиуб.
ИшбархIи Дагъистан Республикализир дахъал челукьути масъулти лер. ГIяхIцад шимазир шин хIедиънила масъала дебали аргъбаибсили бетаурли саби. Илкьяйдали шин диули ахIен шагьуртазирра. Нушала шилизир хIебла замана илди бекIлил хIедирар. Шин умудирути станциябачила гъайикIес хIейрар, сенкIун илди агархIели. Дубуртар Улкализиб илкьяйдали дебали аргъбаибсили бетаурли саби гьундури къулайдирнила масъалара. Ил бяхIчибизлизир, буралли, гIергъити дусмазир гIяхIла шайчир дарсдешуни лер. Амма дарибти гьундури дахъхIи кавлули ахIен. Дехла машинаби дашухIели, сагали кабихьибси къирла къат заябирули саби. Сен илкьяйда бетарусил бурес хIейрус, сенкIун ну ил шайчивси специалист ахIенра.
Илкьяйдали дебали челукьуси масъалали кавлули саби жагьилти адамти хIянчиличил гIеббурцни, хаслира — шимала мер-мусаличиб. Россияла цархIилти мераначил цугбуцибхIели, Дагъистаннизиб хIянчи агартала лугIи дебали халаси саби. Илала дурабад, ишаб алапара — камли.
ЦацадехIти шимазиб тIабигIятла газра агара. Илди шимази къаркъала га дихес къиянни ва илдала багьа дурхъали саби. Нушала хIякимтани, челябкьуси манзиллис ил масъала арзили бирар или буриб.
ХIера, илдигъунти ва цархIилти гIяхIцад масъулти лер, сарира чараагарли арзес хIяжатти. ДирхехIе сагали чеббикIибти депутатунанира илди чула пикрумала дурар кахIелахъниличи.
Набра вирхес дигулра нушала Россиялизир гIяхIла шайчир дарсдешуни алкIниличи, сагали бикIибси Пачалихъла Думали ва Халкьла Собраниели гIядатла адамтачила хъумхIертниличи.
