Сентябрьла 28-личиб Р.ХIям­за­товла уличилси ре­спуб­ликала Миллатла библио­те­кализиб, халкьани-ургабси динна жа­гьилтала VIII-ибил мажлисла дазур­базиб, «Терроризмала идео­логиялис къар­шидеш дирнила ва мяхIкамдеш бир­нила шайчирти халкьани-ургарти уста­деш» бикIуси конференция бетер­хур.
Балбуц абхьиб ДР-ла миллатла политикала ва динанала къуллукъунала шайчивси министр Энрик Муслимовли. Цалабикибтачи дугьаилзули, илини ахъдуцибти масъултала мягIничебдешличила аргъахъиб.

Министрли хIялумцIлабала хIясил­ти ва мажлисла бутIакьянчибала пик­ру­ми-хIерани жагьилтас рухIла-пат­ри­о­тиз­малашалси бяркъ бедлугнилизир пай­даладарес вирар или цIакьбарили буриб.
Сунела яргализиб, ДР-ла Муфтиятла председатель МяхIяммад Майрановли жагьилти-ургаб терроризмализибад мяхIкамдеш бирнила шайчиб иргъахънила хIянчи дурабуркIнила масъала аргъбаибсили биъниличила багьахъур.
Египетлизивадси, исламла ихтиюртала шайчивси хIялумцIлабала доктор Адхам Таммам Фаррадж ГIябдуряхIманна гъай хIясибли, бекIлидиубти масъултазибад цали бетарули саби бахъалгъунти адамтани динна белкIанала мягIна бархьли хIергъни.
Багьудлуми тIинтIдируси «Дагъистан» центрлис бекIдеш дируси ГIисахIяжи ГIусмановли жамигIятлис дебали урехиласи терроризмалис къаршидеш дирнилизиб светский ва динна гIялимтала цIакьани уржахъес хIяжатли биъниличила буриб.
Конференцияла бузерилизир илкьяйдали бутIакьяндеш дариб ДР-лизирси дурхIяла ихтиюрти далтахънила шайчирси уполномоченная Марина Ежовани, Москвала ва лебилра Русьла Патриархла пресс-службала гьавкьяси редактор Дмитрий Асратянни, республикала вузанала, гIилмула цалабикла, хIукуматла органтала, динна ва жамигIятла организациябала, СМИ-бала вакилтани, илкьяйдали мажлисла экспертунани.
Ахирличиб ДР-ла миллатла политикала ва динанала къуллукъунала шайчивси министр Э.Муслимовли лебтасалра сабухъчебси ихтилатлис баркалла багьахъур.