Халкьани-ургабси театртала кӀиибил фестивальли Дагъистаннизиб сунела бузери бехӀбихьиб. Балбуц абхьиб шадлихъла далдуцуначил, дам-дядла тӀамрачил ва ил дурабуркIнилис сиптакартала саламтала дугьбачил.
ДР-ла культурала министрла заместитель Медина Жаватхановани лебилра цалабикибти ва фестивальла бутӀакьянчиби мубаракбариб: «Иш театрла мажлисли жамигIятла-политикалашалси мягIничебси хӀянчира бирули саби. Халкьани-ургабси даршудеш мяхIкамбирули, гьалмагъдеш уржахъули, мез гьаладяхӀ дашахъули, культурала ва дурхъати гIядатунала кьадричебдеш имцIабирахъули».
Жюрила председатель, театртала шайчирси критик Елена Покровскаянира сунела пикруми дуриб: «Афишаличир гьанна рах-рахли чедиахъути пьесабицун ахӀенну, илаб лебил дунъяла классика леб. Наб рирхес дигулра фестиваль таманбиубхIели, иличила хабар лебилра дунъяличи тIинтIбирниличи».
Илди дугьбачил кьабуликиб Урусла театрлис бекIдеш дируси Тимур МяхӀяммадовра: «Нушачи башес дигахъули саби, сенахӀенну Дагъистан мурталра «гӀяхӀлас Мекка» сабри ва илгъунали кавлан. Илала дурабад, Дагъистаннизир 12 театр лер, илдазирад дахъалгъунти миллатунала сари. Ил багьандан, чараагарли илдигъунти далдуцуни Дагъистаннизир алкӀахъес ва дурадуркIес чебиркур».
Фестиваль ибхьнилис хасбарибси балбуцла дазурбазиб, Абхазияла пачалихъла жагьилтала театрли А.Лорентсла «БерхIи гIелабикибхIели» («После захода солнца») бикӀуси пьеса хӀясибли спектакль чебаахъиб.