ХIябал бархIила духIнар республикализир выборти ­детерхур. Илди ахъси даражаличир дурадеркIиб рикIаслира, хатIахIериркус.

ТIамри дедлугахъес хасдарибти избирательный участокуначир лерилра лайикьти шуртIри гIердуцилри.
ГIергъиси замана гьар-чинабалра тIинтIбиубси, коронавирусла чейхъуси изайзибад мяхIкамдешлис илар дяхIликалаби, хъаткни ва цархIилти гIягIниахълуми лерри.
Выборти лайикьси даражаличир детерхахъес ­кумекладиуб жамигIятли хIеруди бирнила ва видеола кабизуни. ­Илгъуна гIяхIси хIядурдеш гьарил избирательный участокличиб хIисаббирулри. Ил багьанданра Россияла ­избирательтала ­кабизличи бирхауди бихьиб, дагъистанлантани ва ­россиялантаницунра ахIи, дурала улкнала экспертунанира ­бархли. Нукьсандешуначила гъайикIалли, илди илцадра камтири, ва выбортала баянтачи ­сегъуналра асархIебариб.