Дагъистаннизир коронавирусла чейхъуси изайчил ­дархдасахъи кадизахъурти, къадагъалати тяхIяр-кьяйда ­сагадан даимдарили сари. Илкьяйдали илди духъяндитIахъи сари иш ­базла ахирличи бикайчи.

Илгъуна хIукму кьабулбарибси саби регионна бекIливиубси санитарный тухтур Николай Павловла маслигIят хIясибли. ЗягIипбиркутала лугIи 4,3 процентла камбиубли саби. Амма, ­гьалаб кьяйдали, гьаннара вакцина бирахъутала кьадарра гIяшли кавлули саби, 25 процентличи абиркули.
ГьанбиркахъехIе, дурхIнас хасдарибти клубанала, мукъри дурадуркIути заланала, бамсриихъути организациябала, вачарла центртазирти ва дугила клубаназирти берк-бержла майдунтала бузери тIашаибси саби. Илкьяйдали къадагъабирули саби бахъла бутIакьяндешличил динна далдуцуни дурадуркIес.
Иличи че, театртази, кинотеатртази, фитнес-заланази, ­музейтази ва библиотекабази башутала кьадар 25 ­процентличиб имцIали биахъес асухIебирар. Къадагъалати тяхIяр-кьяйда ­къячдилкути сари адамти хурегли балхути мераначира, илди ­дугели 11 сягIятличирад савли 6 сягIятличи бикайчи дузес хIедирар.
65 дусличибра имцIали биубти пенсионертас хъулиб буънила тяхIяр-кьяйда даимдарили сари.