Дагъистанна мер-мусаличиб «Малое и среднее предпринимательство и поддержка индивидуальной предпринимательской деятельности» бикIуси миллатла проектла дазурбазиб, гIулухъа дурхI­ни финансунала шайчирти багьудлумачи бегIбирнила Олим­пиада бехIбихьили саби. ДР-ла печатьла ва багьахънибала Министерствола хасси заллизиб Олимпиадала хIекь­лизибси балбуц бетерхур. Иличир «Фаб­рика предпринимательства» проектла вакил Мурад Жалиевли, предпринимательти гIеббурцуси центрла руководительла заместитель Бахрам Мирзоевли ва журналистунани бутIакьяндеш дариб.

«Нушала саберхурти, бузери дигахъути халкь саби. Школабази дашухIели, дурхIнани ил темаличи халаси иштяхI дакIубирниличи пикри бяхIчиаира. Багьудила учреждениебала директортанира нушала дурсрас ахъси кьимат кабатур. Илдани нушала экспертуни чеимцIати дурсри кадирхьахъес бархли жибариб», — викIи М.Жалиев.
Ишдуслизиб, проектла дазурбазиб, «Фабрика – дети» бикIуси программа бетерхахъес пикрибарили саби. Экспертунани республикала школабазир, лицейтазир ва гимназиябазир бурсидешла дурсри кадирхьу.
Олимпиада кIел бутIаличи бутIили, дурабуркIуси саби: хас­ти тестани ва задачаби он­лайн тяхIярли арзни; их­ти­юртала ва финансунала багьудлуми белгидирути цахI­нар­ти кейс-задачаби арзни, пик­риикIнила бетуц белгибарни.
Центрлизир предпринимательти бурсибирути далдуцуни, экспертунала бутIакьяндешличилти мажлисуни дурадуркIниличила, илкьяйдали бизнес-план цалабяхъяхъес предпринимательтас кумекбирниличила буриб Б.Мирзоевли.