Дагъистан Республикали­зирад­ти дабри дирути чумал фабрикали халкьани-ургаб­си «MosSHoes» бикIуси хасси выс­тав­ка­лизир бутIакьяндеш дирули сари.
Москвализиб дурабуркIуси ил балбуцличи дунъяла декIар-декIарти мер-мусаличибад вакилти бакIилри. Чули дарибти дабри ва илдас хасти ваяхI гьаладирхьу нушала республикала BOFF, Gans, СлимМен, Iridson, ADAM фабрикабанира.

ДР-ла промышленностьла ва вачарла Министерстволи, Дагъистанна вачар-чакарла ва арц дузахънила масъултазиб бузуси Агентстволи, предпринимательти гIеббурцнилис хасбарибси программа хьулчили буцили, республикала бюджет­лизирад харжани декIардарили, нушала дабри дирантас чебаъла гIягI­ни­ахъала (стенд) абхьибсири.
Балбуцличи бакIибти гIяхIлани Дагъистанна устнани дарибти дабри чихъли кьиматладирулри. Россияла декIар-декIарти шагьуртазибадти халати тукентала бегIтани чучир республикализир дарибти дабри дурхахъес пик­рибарили саби. Ца фабрикала вегIли бурни хIясибли, ишар дарибти дабри Россияла халати тукентани исули сари, амма илди дурхахъули сари чула фирмала у кабизахъурли яра кабяхъили. Нушала республикализир дирути дабри гIяхIси даражала сари. Иличила дагъис­танлантани гIяхIил бала.
GANS бикIуси компанияла руководитель Кьурбан Макиевли бурни хIясибли, Дагъистан Республикализибадти дабри дирантала Россияла базурти чули дирути ваяхIли дицIахъес имкан леб. СенкIун ишар дирути даб­ри гIяхIти сари, илдала багьа биалли (цархIилталайчил цугбуцибхIели), дургIеси саби. Нушала республикализирад дабри цархIилти мер-мусаличи диахъесра гьамадли саби, дурала пачалихъуназибадичиб. Кь.Макиевли даб­ри дирнилизиб ва илди дурхахънила вачарлизиб бекIлибиубси, челукьуси масъалализи халбирули сай ил шайчиб бузути гIяхIти устни ва специалис­туни камли биъни. Ил багьандан, чула компания сетевикуначил саби чIянкIли бузуси, чула тукенти хIебхьули. COVID-ла чейхъуси изала тIинтIбиубси замана, Интернетлизирад дабри иснила тяхIяр имцIали бузахъули чебиур. Ил журала вачар къелгIеббикес балути специалистунира камли саби нушачиб. «Нушала жагьилтас, къиян кахIесили, бусягIятал дахъал дигули сари», – буриб Кь.Макиевли.
Избербаш шагьарлизибадси Iridson бикIуси компанияла вакил Раисат БяхIяндовани «MosShoes» бикIуси балбуцличиб Дагъистаннизибадти даб­ри дирантас гIяхIил гьунибаиб или буриб. Нушала республикализибадти предпринимательтала халаси къайгъи бирар цалис ца кумекбарес. «Нушала вачар баресцун ахIен пикри. Халаси иштяхI бирар республикализирадти цархIилти фабрикабалара ваяхI гьаладихьес, – пишряхъили бурули сари Р.БяхIяндовани. – Турцияла машгьурти дабриличил нушала цугдуцаллира, вайти ахIен. Багьа биалли, илдалаван ахIи, дургIели саби».
Нушала компаниябас вачарла хIекьлизирти мягIничерти вягIдурти дигьес ва бархбасуни кадизахъес имканбикIули саби. «MosShoes» выс­тавка нушала республикала дабри дирнила кьяли гьалабяхI башахънилис гьаликIлира бетарар.