ГIядатлибиубливан, нушала улкализиб гьар дус сентябрьла 1-личиб багьудлумала БархIи дурабуркIуси саби. Ил школабазиб ва вузаназиб бучIутала, илдала бегIтала ва мугIяллимтала байрамли бетаурли саби. Хаслира иличи разили бирар вавнала халубачил бегI гьалаб школализи аркьути дурхIни. Ил бархIиличирад цаибти классуназиб бучIути дурхIнала гIямру гIяхIцадла дарсдирути сари.

Гьаланачи нушаб багьудлумала дунъялизи унза гьаргдиру школала мугIяллимтани, илдани сарра нуша лугIурбачил ва хIурпрачил тянишдирути, гIур— вузанала преподавательтани. Багьудлумани сай адам жагаируси, илди сари сагаси секIал алкIахънилизир гьаликIли детарутира. Пикриухъалли, гьарра шайчивад пагьмучевси, мурхьти багьудлумачилси адамличил ихтилатикIесра дигесли бираргу.
Нушази диштIахIейчирадал «ГIямрулизир сархибдешуни диахъес багьандан, дучIеная» или бикIули бири. СанигIят касес, вегIлис дигуси бузерилизи ахъес, гIякьлу-дагьрилашал гьалавяхI вашес, илкьяйдали гIямрула мягIни-хIял иргъес, гIяхIра вайра декIардирес багьандан багьудлумачил вегIиъни, гьайгьайрагу, чараагарси саби.
Гьаннала замана багьудлумала гIяхIцад хьулчни лер. Амма, гьалаб кьяйдали, бегIлара марси гьалмагъли бетарули саби жуз. Жузани адам гIямрулизив хатIахIейкахъес, илизи къиянти масъулти ирзахъес кумекбиру.
Багьудлумала БархIила байрамли багьудила мягIничебдешличила иргъахъули саби. Багьудлумачил дегIдиубхIели, нуша жамигIятлис, улкалис пайдалатили детарулра, илдала кумекличил гIямрула бархьси гьунчирад дашулра.
Адамла гIямрулизиб багьудлумани мекелли халаси мер бурцниличила хъуммартидая ва багьудичертили халадаэс къайгъибарая!