Хайдакьла районнизирадси 88 дус риубси, журналистка, бузерила ва тылла ветеран Асият МяхIяммадсягIидова вакцинаби дарахъая или хайдакьлантачи дугьарилзули сари.
«АхIерти хайдакьланти! Узби ва рузби! Ну районна гьести гIямрула адам сарлин, хIушази бурес дигулра, гIямрулизир нуни жура-журала излуми, къияндешуни, дургъби чедаибти сари. Гьанна рухънараибхIели, ишгъуна вайси коронавирусла чейхъуси изайчилра къаршириркус или гьанхIебирки», — ибти дугьбачил бехIбихьиб Асият МяхIяммадсягIидовани сунела дугьабиз.
КIинайс илини гьарил адам вегIлисцун хIерируси хIейъниличилара гьанбушиб. Нушала дурхIначи, дурхIнала дурхIначира, гьамтачира пикридикIес гIягIнили биъниличилара буриб.
«ПикридухъахIелли, 88 дусла гIямру деркIалли хIебиусив или гьанбиркули саби. АхIен или бурес дигулра наб. Нушала дурхIнас кумекбирули, илдала разидешра пашмандешра дарх дуртIули нуша хIердирутира. Ил багьандан нуша бебкIаличи гьалакли ахIенра. Гьанна биалли, лерилра дарх изайчи къаршили дургъес хIяжатси саби. Ил багьандан, даширая, лебтанилра вакцина бирахъехIе. СенахIенну, ил бегIлара лайикьчебсили бетарули саби ишбархIила замана коронавирусла чейхъуси изайчи къаршили дургънилизиб», — рикIи ил.
