Японияла тах шагьар Токиолизи Олимпийский хIязаначи 30-цад дагъистанлан бякьун. Илди 11 улкала командабази каберхуртири, ва чули, гьаларван ахIи, дахъал журала абзаначир бутIакьяндеш дирутири. ИмцIаливан —азадли мушулбашнила ва боксла абзаначир.
Олимпиада таманбиуб. Дагъистанна мушлукьябани ва боксертани 7 медаль сархиб: 3 мургьила, 2 цIуба арцла ва 2 жармала. Мургьила медальти сархиб мушлукьяби ГIябдулрашид Садулаевли (97кг.), Заур Угуевли (57кг.) ва боксер Альберт Батиргъазиевли(57кг.). ЦIуба арцла медальти сархиб боксер Муслим ХIяжимяхIяммадовли (91кг.) ва Белоруссияла командализив вирхIуси мушлукья МяхIяммадхIябиб КьадимяхIяммадовли (74кг.). Жармала медальти дикиб боксер Земфира МяхIяммадгIялиевас (75кг.) ва мушлукья ХIяжимурад Рашидовлис (65кг.).
Ахирра хIябэсил яргара мушлукьябала кьалтинничиб цаличил ца къаршибикиб дагъистанлан ГIябдулрашид Садулаевра Америкализивадси Кайл Снайдерра. Илди кIелра 2016 ибил дуслизиб Рио-де-Жанейролизир детерхурти Олимпийский хIязаначиб чемпионти бетауртири, ГI.Садулаев 86 килограммла битакIлизив вирхIули, Снайдер — 97 килограммла битIакIлизив.
2017 ибил дуслизив дунъяла чемпионатличив вирхIуси ГIябдулрашид Садулаев Кайл Снайдерличивад очкоби хIясибли удивикибсири. 2018 ибил дуслизив биалли, яргаси дунъяла чемпионатличив «Урусла танк» ГI.Садулаев (илис или бикIутири) сунела вахъхIила къаршикар Снайдерличивад, илала кIатIа-кьулсни кьалтинничи гачдикахъили, чедивикибсири.
Ишди бурхIназиб, Токиола Олимпиадала 15 ибил бархIи, илди гIурра чараагарли къаршибикес гIягIнитири. Илдас гьамадли ахIенри финалличи баэс. Ил гьунчиб ГIябдулрашид Садулаевли чисалра цалра балл хIегиб ва 19:0-личил сунела къаршикарличи ваиб (чучивад ГIябдулрашид чедиикибтала ургаб дунъяла ва Олимпийский хIязанала чемпионтира лебри).
Августла 7-личиб хIерила гIергъи, нушази бахъал халкь сунечи хIерси мушлукьябала абз чебаахъиб. 6:3 счетличил «Русский танк» ГIябдулрашид Садулаев сунела къаршикарличивад чедивикиб ва Россияла командалис азадли мушулбашнила шайчибси авэсил мургьила медаль сархиб. Ил чедибдешли Дагъистанна азадли мушулбашнила жура Америкалайчиб къулайси биънира чебаахъиб.
Токиолизибси олимпиадаличир сархибти чедибдешуни ва медальти хIясибли лерилра Кавказла республикабазибад ва улкназибад Дагъистан Республика цаибил мерличи бакIиб. Ил нушаб, дагъистанлантас, халаси разидеш саби. ГьатIира халаси разидеш саби Олимпиада гIеркIухIели Россияла командала байрахъ бихахъес Олимпийский хIязанала кIина чемпион дагъистанлан ГIябдулрашид Садуллаев чеввикIнира.
Бурес чибиркур иш секIалра. Ишди бурхIназиб нушани багьурра Токиолизир детаурти Олимпийский хIязаначир медальти сархибти урегалра дагъистанлан РФ-ла Президент В.Путинна шайзибад Россияла ордентачил ва медальтачил шабагъатлабарили биъниличила. ХIера, илдала уми:
— азадли мушулбашнила шайчив кIина Олимпийский хIязанала чемпион ветаурси ГIябдулрашид Садулаев – ХIурматла орденничил (орден Почета);
— азадли мушулбашнила шайчив Олимпийский хIязанала чемпион ветаурси Заур Угуев ва боксла шайчив Олимпийский хIязанала чемпион ветаурси Альберт Батиргъазиев – Гъалмагъдешла орденничил (орден Дружбы);
— боксла шайчив Олимпийский хIязаначив арцла медаль сархибси Муслим ХIяжимяхIяммадов ва азадли мушулбашнила шайчив жармала медаль сархибси ХIяжимурад Рашидов – «ВатIан гьаларти къуллукъуни багьандан» орденна («За заслуги перед Отечеством») цаибил даражала медальличил;
— боксла шайчир Олимпийский хIязаначир жармала медаль сархибси Земфира МяхIяммадгIялиева – «ВатIа гьаларти къуллукъуни багьандан» орденна кIиибил даражала медальчил. Ура! Дагъистан.
