Коронавирусла чейхъуси изайчи къаршиси вакцина бирнила хIекьлизир адамтала дахъал суалти алкIули сари. Нушани ишар бегIлара тIинтIти суалти ва илдас жавабти гьаладирхьулра.

1. ЗягIипикили гIергъи акIубти антителабазирад прививка барибхIели акIубти антителаби декIардулхъулив?
Тухтуртани бурни хIясибли, декIардулхъули сари. Вакцинали изайчи къаршити антителаби алкIнила бузери жигарчеббирули саби. Илдала пикрили, прививкали адам коронавирусла чейхъуси изайзивад мяхIкамирули сай. ЗягIипикили гIергъи саби-сабил бируси иза чехIейсудешличила гъайикIалли, кьаркьала цIакьагарбиубхIели, вирус чедибикес асубирар. Иличибли антителабала даражара усалбиркур. Эгер адам декIли зягIипикили виалли, антителаби бекIлил дакIухIедиэсра асубирар.
ЗягIипикили гIергъи чула-сарил дакIудулхъути ва вакцина барахъили гIергъи алкIути антеталабала ургаб бижгурдеш бетаруси ахIен. Иличи ургIебли, иза чехIейсудеш цIакьбиэсра асубирар. Бархьли буралли, зягIипбикили гIергъи, дахъал антителаби дакIудухъунти адамтас прививка циила кьанниван барес асубирар.
2. Прививка барахъили гIергъи, иза чехIейсудеш сецадхIи кавлуси?
Вакцинала кIелра бутIа дарахъибти цацабехIти адамтала антителабала даража 9-12 базла бухIнаб гIяшбиэс асубирар. Буралли, манзилла излумас ил гIядатласи саби. Гриппличи къаршиси вакциналира лерилра гIямрулизиб иза чехIейсудеш бетарахъули ахIен. Коронавирусличи къаршиси прививка барахъибхIелира, замана дикибхIели антителабала даража гIяшбирули саби. БегIлара мягIничебси саби 50 процентла кьадарлизиб прививка барахъибтала иза чехIейсудеш бахъхIи кални.
3. Чис асухIебируси прививка барахъес?
Covid-19-личи къаршиси вакцина барахъес асухIебирар: 18 дус хIейубси адамлис; кьаркьай изала чехIейсан адамлис; дурхIялис раибси ва дурхIя ниъли валхуси хьунул адамтас; дарман балхIебиркуси адамлис.
Илкьяйда «ЭпиВакКорона» вакцина барес асухIебирар демдрила изайзибти яра наслуличирад-наслуличи дашути, дебали камли къаршидиркути излумала бегIти адамтас. Гьалар дарибти прививкабани изала цIакьбиахъубти адамтас «КовиВак» вакцина бируси ахIен.
4. Сегъуна анцIбукьлизиб вакцина гIелайчи архахъуси?
Гьигьла биркIантачи хасси изайзи викибхIели, кьаркьайзирад дибгIянти дакIриби дурадикибхIели, хIулила дурала кам бемдурхIели ва цархIилти излумази викибхIели вакцина гIелайчи арбухахъес маслигIятбирули саби специалистунани. Гьаланачи сагъдиубли, кIинайс вакцина барахъес тухтуртачи дугьадилзеная.
5. Вакцинала кIиибил бутIа хIяжатхIебиркути анцIбукьуни къаршидиркули дирару?
Лебтасалра ашкарливан, коронавирусличи къаршиси вакцина кIел бутIаличи бутIили бирули саби. Амма, кIиибил прививка хIебирути анцIбукьунира къаршидиркули сари. Роспотребнадзорла сайтличиб балахъуливан, эгер цаибил прививка барахъили гIергъи, адам коронавирусла чейхъуси изайзи викалли, илис кIиибил прививка бируси ахIен. КIиибил прививкала хIекьлизиб тухтурличи дугьаизес чебиркур.
6. Прививка барахъес гьалаб антителаби лерал агарал белгибарес ахтарди дурабуркIахъусив?
Ил суал гIяхIцад адамтани хьарбиули саби. Тухтуртани бурни хIясибли, илизиб сегъуналра мягIна агара.
«Антителаби вакциналис диргала­дулхъути ахIен. Эгер хIуша зягIипдикили гIергъи, антителаби дакIудиалли, вакцина барахъибхIели, илдала лугIи имцIабирар ва иза чехIейсудеш чIумабирар», — викIули сай иза чехIейсудешла шайчивси тухтур В.Болибок. Роспотребнадзорлизиб балахъуливан, ахтарди дураберкIни — вегIла къуллукъ саби.
7. Вакцина бирнила хIяракат секьяйда бетурхуси?
Прививка барахъес аркьуси сай чарх-бекIла аги къулайси замана. Ил барахъес гьалаб анкета бирцIахъуси саби ва тух­тур­ли хасси ахтарди дурабуркIуси саби.
8. Прививка барахъили гIергъи, декI­ти асурти хIедиахъес багьандан, ан­ти­гис­­та­минный дармунти пайда­лади­ру­тив?
Роспотребнадзорлизиб балахъуливан, илдигъунти дармунтани кьаркьайс зарал бетарахъули саби.
9. Прививка барахъес гьалаб ва ба­ра­­хъили гIергъи, лайикьси аги калахъес ба­гьандан, парацетамол бержес гIягI­ни­лив?
Бахъалгъунти адамтани декIти асурти детхIеахъес или гьала хили парацетамол пайдалабирули саби. Илкьяйда бирнира бархьси ахIен, сенахIенну дармай анти­те­лабала даража гIяшбиахъес асуби­ру­хIе­ли.
Гьала хили кьаркьа температура гIяшбирахъути дармунти дужес асу­хIе­бирниличила хъуммартидая. Илди дужути сари чIянкIли кьаркьа температура ахъбиубхIели.
10. Прививка барахъили гIергъира зягIипикес асубирару? ЗягIипиркалли ил селис бирахъуси?
Тухтуртани бурни хIясибли, прививкали адам изайзивад арагIевли мяхIкамирули ахIен. Амма, вакцина барахъибхIели, изала чехъалра, декIти асурти агарли, гьамадли чебаркьули саби.
«Цаибилгъуна, иза чехIейсудеш­ли­зиб лебталалра хасдешуни дирути сари. Вакцина барахъили хьалли, гIягIниси тяхIярли кьаркьайчи асархIебирути адамтира леб. Илдигъунтас ислаличи цугси дарма кьадар хIебаэс яра имцIабухъес асубирар», — буриб чейхъути излумала шайчивси тухтур А.Поздняковли.