Дагъистан дявила-урхьула флотла БархIи дурабуркIниличи хIядурбикIули саби. Халаси дявила парад гьанна кIинайс бетурхар Каспийсклизиб июльла 25-личиб. Каспийла флотилияла хIянчизартани гьатIира чула цIакь чебиахъу. Ил парадлизир бутIакьяндеш диру дявила 30-лицад гамили ва къаякъли, 500-цад хIянчизарли. Илкьяйдали бузерилизи битIикIу авиацияра. Ил биалли, урхьула халаси байрамла биштIаси бутIацун саби.

Каспи урхьуличирти илди бегIлара гIяхIти гамурби – Россияла югла дазурби далтахъуси, гьарли-марси цIакь саби.
Гамиличиб тIашти бахъалгъунти морякуни чула гIямрулизибси цаибси парадличи хIядурбикIули саби. Ил бетерхес дебали камси замана саби калунси. Сен-биалра Каспийскла флотилияла дявила бургъантала, чула устадеш чедаахъес имканбикIуси, хIядурдеш бируси ил бегIлара гIергъиси балбуц ахIен.