ИшбархIи лебилра дунъяличиб кахси, сунесра COVID-19 или бикIуси изала сага­дан, хъярхъли тIинтIбикIес бехI­би­хьи­ли саби.

ГIялимтала пикри ва баянти хIясибли, дунъяличиб хIер­бирути бахъалгъунти адамти сен-биалра ил изай зягIип­хIе­бикили кахIевлан. Гьанна ил иза «хIябэсил гьуцI-рамч» саби. Нушала пикри сабри ил багьлали беткайхъур или. Амма ил беткайхъуси ахIен. Ил, грипп кьяйдали, адамти-ургаб кавлуси саби. Халкь иличил хIербирес бурсикабирар. Илгъуна агиличи шурдухъес багьандан, адамтала «бархси (коллективный) иммунитет» акIахъес хIяжатбиркур. Ну­шала медицина ва гIилму гьа­ладяхI ардукьниличил ил жявли алкIан или умут леб. Цар­­хIилван биалли, вецIани дусми хIяжатдиркур нуша ил изай­­чирад чедидикес багьандан.
ИшбархIи декIар-декIарти улкназир вакцина пикрибарили саби ва ил халкьлис бирули саби. Амма нушала адамти ил секIал барес къалабабикIули ахIен. Бахъла иличи бирхауди агара. Илис сабабтира – Интернетлизирад тIинтIдирути видеоби сари, чузибра цацабехIти адамтани вакцина барнилизибад нушаб (халкьлис) урехи леб или балахъути. Илдачил бахъалгъунти гIялимти ва медицинала хIянчизарти кьабулли ахIен, ва нушала арадеш мяхIкамбарес багьандан, чIянкIли вакцинали кумекбиру бикIули саби. Россия Федерацияла закон хIясибли, вакцинация саби гIяхIъулали бируси секIал саби. Ил барахъес гуж барес асухIебирар. Иличил бархбасахъи, гьайгьайрагу, иргъахънила хIянчи дурабуркIес чебиркур.
ЦагьатIи журала урехи леб нушала халкьлис COVID-19 тIинтIбирниличибли. ХIушанира балуливан, Россияла медицинала дахъалгъунти учреждениеби чейхъуси изайзибад адамти арабирес хасдарибтачи шурдатуртири. Иличибли цархIилти излумази бикибти чучи хIеруди агарли калунтири. «Плановый» би­кIу­си лечение гIелайзи арбу­хиб­сири. ЧIянкIли хъярхъси кумек сабри зягIиптас гIеб­биахъуси. Ил сабабли бетаурли, бубкIутала лугIи им­цIабиуб. Арадеш мяхI­кам­бируси Ми­нис­терствола баянти хIя­сиб­ли, 2020-ибил дуслизиб бебкIибтала лу­гIи­лизибад чIянкIли 30 процентла саби коронавирусла изайзибад алхунти. ХIе­биалли, бахъалгъунти цар­хIил­ти излумазибадра алхун. Им­цIатигъунти специалистунала пикри хIясибли, заманаличиб «плановое лечение» хIебарибти адамтала арадеш усалбикес ва челябкьлализиб бубкIутала лугIи имцIабиэсра асубирар. 2020-ибил дуслизиб, 2019 ибил дусличил цугбуцибхIели, 17,9 процентла бубкIутала лугIи имцIабиубли саби. Илдигъунти баянти гьаладихьибтири Россияла министр Татьяна Голиковани. Дила пик­рили, иличил кьабулли саби бахъалгъунти адамтира, нушала пачалихъ хIядурли ахIен ишбархIи излумала шайчиб адамтас алкIуси урехиличи. Илкьяйдали хIядурли ахIен цархIилти кабизунира.
Сен урухкIути нушала халкь вакцина барахъес? Москвализиб ишбархIи QR-код агарли вяшикIес дебали къиянни саби. Ил агарли я тукейзи, я цархIил учреждениелизи вашахъес валтули ахIен. Селис хIяжатси ил секIал? БегI гьалабси яргализиб, хIяжатли саби медицина гьалабяхI арбукес, арадеш мяхIкамбирнилис харжанира декIардирес.