Гьалабван, рес­пуб­­ликала пагь­му­чебти дурхI­нас хас­барибси, дахъал шалу­барси РМЛИ ДОД лицей-интер­нат­лизир аттестатуни дедиб. Ил Северный Кавказлизиб бегI­лара гIяхIтазибад цализи хал­­бируси сагати кьяйдурти ду­захъуси школа саби.

Дусличи-дус лицейла выпускникунани улкала бегIлара гIяхIси даражала вузаназир ахъ­ти хIясилти чедиахъули са­ри. Ишдуслизибра, 55 призер­ли ва 16 лебил Россияла олим­пиадала республикала бу­тIа­лизиб чедибдеш сархибти бу­чIантани, школа гьабкьятала къяянази дураиб.
Лицейли ишдус 165 выпускник дураиб. Илдазибад 67 бучIан мургьила медальти сархести саби. Ил тамай якьинбирар чумал бархIила бухIнаб, ЕГЭ-ла балланачила баянти дагьурхIели. Гьанналис, урус мезла имтихIяйс Наида ГIябдуряхIмановани ва Вадим Ледвановли бегIлара ахъти баллани сархиб. Илкьяйдали Жамбулат Бельгишиевли англияла мезла лебил Россияла олимпиадаличиб чедибдеш сархиб. Илизиб гьанна ихтияр лебси саби Россияла сунес дигуси вузлизи имтихIян агарли керхес. Лицейла илди хIябалра бучIан шагьарла школабала бегIлара гIяхIтигъунти выпускникуначил бархли ДР-ла БекIла къуллукъуни заманалис дузахъуси Сергей Меликовличи жибарибти саби.
РМЛИ ДОД-ла директорла къуллукъуни заманалис дузахъуси Альбина Шутуновани бурни хIясибли, школала бучIантани багьудлумачи халаси иштяхI ва гъира дакIудариб. Или хIебиэсра хIебирар, сенкIун школала мугIяллимти халати устадешла бегIти, республикала вузаназибра дурсри кадирхьути саби. Илди-ургаб гIилмула кандидатунира леб. Лицейлизибси уржибдешли ва творчестволашалти шуртIрани, бучIантази чула пагьмурти гьаргдирахъес имкан лугули саби.
Челябкьла илдигъунти багьуди ва бузери дигути дурхI­назибад дигахъуси саби.
Лебилра бучIантала мура­дуни дааб ва гIямрулизир гьа­тIира дахъал сархибдешуни ди­аб!