Нушала улкализиб хIукуматличи адамтала дирхала лебсив или суал алкIули саби дила. Бахъла ташмишдеш диэсра асубирар.

Нушала мерличибти хIякимтала дурутачи биалли, халкьла жявлил бирхауди агара. Илдани чула къуллукъличи кабиибхIели, чули дарес чесибтачила бекIлил хъумуртули саби. Илдигъунти баркьудлумачил нура чуйнара вяхIягибсира. Гьарил хIякимла ца жаваб саби: «Илис пачалихъли харжани чедаахъили ахIен…», яра «Харжани бекIлил диули ахIен, кIинайс ил суал хIербирехIе…». Тамаша — къуллукъличи сай калтуси замана хIебалусира сегъунти масъултачил вяхIигес чебиркурал ва илдазирад аргъбаибтигъунти бекIдарес хIяжатли биъни. Юх, лебтанилра балули саби селис гьуцIтил адамти хIякимла къуллукъличи. Илдала чула киса бицIахъес пикри саби. Ил чисалра дигIяндеш ахIен.
Гьалабван Россияла Президент В.Пу­тин­на «бархьаначиси линия» бетерхур. Ил­дигъунти далдуцуни нушала пачалихъли­зир гIядатли детаурли сари. 2020-ибил дус­лизиб чейхъуси изала тIинтIбикIни пик­рилизи касили, ил дураберкIибси ахIенри. Ишдуслизиб ил заманаличиб бе­тер­хурсилизи ва мягIничебсилизи халба­рес вирар, сенкIун дахъхIи агарли нушала ул­кализир мягIничерти выборти дура­дур­кIути сари. Илдала баянтазибад дига­хъу­си саби (имцIаливан) нушала улкала че­лябкьлара. Пачалихъла Думализибти хIя­­кимтазибад дигахъу секьяйда дузарал ну­шала хIукмурти, гIеббурцул илдани Президентла политика ва бекIдирулил адамтала масъулти. Бархьли буралли, гьачамлис нушала депутатуни гIядатла халкьличи циила камли пикрибикIули саби.
Президентли, халкьла суалтас жавабти лугули, дебали мягIничерти масъулти ахъ­дуциб. Алапабачила, пособиебачила, пенсиябачила ва гIяхIцад цархIилти бяхI­чи­бизунала черкад адамтала дахъал суалти алкIули сари. Наб ил ахIен тамашабизурси. Халкьла суалти сеналра камдирути ахIен, сенахIенну нушала пачалихълизир челукьути гIяхIцад лер. Тамашабизурси, илди суалти пачалихъла БекIлизи хьардиъни саби. Лерилра масъулти мерличибти хIякимтани ирзес хIяжатси сабигу. Суал хьарбаэс бекIхIебиубли лебай, мерличибти хIякимти ил масъала арзес ва улкала Президентлизи жаваб бедес гьуцIлизибри. Марлира, хIебалулира жавабла къуллукъличибти хIян­чи­зар­тани илди масъултачила? Юх, балулри. Президентлизи суалти хьардаэс гьалаб, ле­билра илди масъултачил чула мерличирти администра­ция­бази дугьабилзутири. ХIе­биалли, сен илди хIякимти, акIубти масъулти ирзхIерзни ба­гьандан, хIянчурбачибад акьухIебатурти? Масъала Президентличи баахъибхIели, ил арзес имканти даргибгу.
Нушала улкализиб коронавирусла чейхъуси изайчил бархбасунси аги дебали челукьусили бетаурли саби. ЗягIиптала лугIи камбирули ахIен. ХIейгеси биалра, илдала лугIи бархIиличи-бархIи имцIабикIули саби. ИшбархIи нушала улкализир чумал журала вакцина лер. Амма халкь ил барахъес къалабабикIули ахIен. В.Путинни суненира вакцина барибси саби или багьахъур ва цархIилтира ил барахъес жибариб. Буралли, вакцина хIебарили, цархIил журали масъала арзес имкан лебсив?
Пособиеби ва адамтас арц дедлугниличи бахъал разили бургар. Илди арцли бахълис ишбархIи дебали кумекбиру. Дила пикрили, адамтас бузахъес имканти акIахъубли ва чула бузерилис заманаличиб лайикьси алапа бедлугуси биалри, гIяхIсири или гьанбиркули саби.