Сергокъалала районнизиб «Халатала наслу» би­кIу­си проект жигарчебли бетурхули са­би.

Гьанна бузесаибси проектлара бекIлибиубсигъуна масъалали бетарули саби адамтала гIямрула шуртIри къулайдирни ва пенсияличи абаибти ва абиути халкьла гIямру гIеркъадирахъни.
«Халатала наслу» бикIуси проектла дазурбазиб ца­ла­бяхъибси программализи кадерхахъурли сари: халабетаибти адамтачи хIеруди бирни, илдас хIя­жатси кумек гIеббиахъни, чулахъуначи пикри бяхI­чиаъни ва цархIилти масъулти. План хIясибли мо­бильная бригада УбяхI МулебкIила ва БахIмахьила ши­мази бякьи саби. Районна больницаличил барх кабизахъурси график хIясибли дурабуркIуси саби ил архIя. Коронавирусла чейхъуси изала тIинтIбирнила аги-кьяйда хIисаблизи касили, «Сергокъалала район» МО-лизибси КЦСОН-ла дирекцияли чейхъутачил дарх­хIедасунти излумачи хъулразиб хIербикIес пик­рибариб.
ЦРБ-ла руководстволичил барибси вягIда хIя­сиб­ли, хъулиб арадешлашалси ахтарди дурабуркI­ни­личи тух­турти хIядурли саби. Медицинский осмотр барес хIяжатти 65 дусла чедибти адамтази гьала хили бурибсири ил тяхIярличила. Илкьяйда архIяличи башути тухтуртала кьукьялизиб леб терапевт, медсестра, лаборант, психолог, юрист, социальный бяхI­чибизлашалси хIянчизар, суненира адамтала суал­тас жавабти дедлугуси ва илдачил хасси ихтилат ду­ра­буркIуси. Ил балбуцла дазурбазиб 15 адамлис медициналашал ахтарди ду­ра­беркIиб, ва цархIилти хIян­чизартачил гъайбухъи чу­л­а бекIахъудила гIямрулизир че­лукьути масъулти хIердариб. Ле­билра хIерудилиубти разили калун.