Изала дебали урехиласи саби, асурти биалли, декIтили ­урдухъес асубирар. Ил багьандан июльла 1-личибад ­коро­навирусла чейхъуси изайзи бикибти ­ахтардибирнила ­(диспансеризация) хIяракат бехIбирхьу. Гьалаб изайзи бикили калунти лебтасалра, хасси программа хIясибли, ахтарди дура­бер­кIахъес имканбикIур. Диспансеризация барахъес багьандан, у хIисаблизи касахъес бирар пачалихъла гIяхIдешунала порталличиб, «Дила арадеш» бикIуси бутIализиб яра поликлиникализиб.

Коронавирусла чейхъуси изайзи бикили калунтани чеимцIали анализуни дедлуга, хIилизиб D-димерла концентрат лебал белгибарес. Иличибли тромбани алкIнила лишанти гIячихъдарес вирар.
«Гьанна зягIипбикили калунти адамтани гIяхIцад хIялумцIлаби дурадеркIес бирар, заманаличир декIти асурти детарахъути сабабти белгидарес багьандан. Хаслира ил бетуц мягIничебси саби декIли зягIипвикибсилис. Арабиубли хьалли, бахъла чарх-бекIла хIялани дарсдирули сари», — цIакьбарили буриб М.Мишустинни медицинала учреждениебала бургачилси гьунибаъниличиб.
Ахтардили декIти излуми алкIахънила урехи чебаахъалли, хасси лечение биру.