Хайдакьла районнизиб, коронавирусла чейхъуси изала тIинтIбикIнила урехи камкабиахъес ва пандемия хIяйнайсра районнизи хIебакIахъес багьандан, жамигIятлис вакцина бирнила хIяракат гьар бархIи дурабуркIули саби.
Районна бегIлара гьарахъти шимазиб хIербирути хайдакьлантази гьарахъси гьуни хIехъахъес багьандан, районна бекI ГIялим Темирбулатовли хъарбарни хIясибли, Хайдакьла ЦРБ-ла тухтуртазибад чумал, гIягIниси тяхIярли балкьаахъурси автомашиналичиб, гьар бархIи, кабизахъурси график хIясибли, шимази башахъули, шантазибад прививка барахъес дигутас ил бирули саби.
Хайдакьла ЦРБ-ла бекI тухтурла гъай хIясибли, шалгIеббухъунси жумягIлизиб прививка бирути тухтуртала бригада районна 12 шилизи баили саби. Вакцина бикиб ВарситIла, Кирцикла, Киркила, ЧIибяхIнила, Жинабила, Баршамайла, ГIяхIмадкентла, ХIуллила, ГъярацIанна, Жавгъатла, ЖирабачIила шимала шантас.
БекI тухтурли илкьяйдали ишбархIилис районнизиб 1373 адамли вакцина барили саби или багьахъур. Илдазибад 958 адамли вакцинала кIиибил бутIара ахъили саби.
