Россиялизир чей­хъу­­си иза шай­чир­ти­ ибкь­ти аги-кьяйда ба­гьан­дан арагIерли шими гIей­кIес бехI­бихьиб.

Шилизи бухIнабухъахъес ва илабад дурабухъахъес гIяд­лу-зегъа далтахъути органтани къадагъабирули Ахъушала районна ХIямшимала шилизиб ва Сергокъалала районна ХIурхъила шилизиб. Дурабухъахъес ихтияр лугули саби коронавирусла чейхъуси изайчи къаршили прививка барахъили яра изала чекасили гIергъи, иммунитет лебтасцун. Лерилра хъулри бактерияби дубкIахъути секIайчил чахьдирули сари. Тукентази ва аптекабази цацун адамлис ухIнаухъахъес асубирули саби. Мерличиб хIербирути адамтани кадизурти аги-кьяйдала черкад чула пикруми дуриб.
— Нуша гьанна, урхьулизиб шинна удибад башуси гамилизир кьяйдали, дураласи дунъялизирад гIекIилра, — бурули саби хIямшимай. — Коронавирусла чейхъуси изайзи бикибти верхIел адам больницализи арбукили саби. Илдачил бархбасуни кадизахъурти 15 адам белгибарили леб. Илдалара тест барили, изала лебни чебаахъиб. 14 адам хургьрала изайчил районна больницализи кабаркьиб. Ил багьандан, районна санитарияла шайчивси тухтурла тIалаб хIясибли, шилизиб карантин кабизахъурси саби.
Гьаларван къадагъалати тяхIяр-кьяйда кадизахъуртири ХIурхъила шилизирра. Коронавирусла чейхъуси изайзи биркнила анцIбукьуни имцIадикIес дехIдихьиб муръа-бялгIяла гIер­­гъи, чучирра Москвализи­бад ва Избер­башлизибад ба­­­­кIиб­тани бутIакьяндеш да­риб­хIели. Илкьяйдали бетаур ХIямшимала шилизибра.
— Нушачи бялгIяличи адамти башар декIар-декIарти регионтазибад, — бурули сай ши­ла бекI ХIябибулла Кьутиев­ли. — БегIла гIергъиси ярга­ли­зиб муръа бетаурхIели, нушани адамти цаличи ца гъам­хIебирахъниличи, някъби хIедурцахъниличи хIеруди бу­захъули калунра, илдази децI гьарахълабад багьахъес баян­бирули. Гъамтазивад ца адамла урехиласи чейхъуси изала лебли уббухъун, илини гьаланачи хъалибарг зягIип­би­кахъиб, илди унрубачи бякьири, илкьяйдали изала тIинтI­биуб­лири.
ХIябибулла ХIяжиевичли карантинна замана шилизи адам ухIнаулхъниличи ва ду­раулхъ­ниличи гIядлу-зегъа дал­­тахъути органтани хIеруди бу­­­захъули бирар или багьахъур.
— Прививка барахъибси яра антителаби лертас шилизибад дурабулхъес асубируси саби. Нушала бахъалгъунти адамти райцентрлизиб бузули саби, имцIаливан – тухтурти ва полицияла хIянчизарти. Шилизивад дураухъес асубирар медицинала баянти хIясибли, эгер адамлис больницализи укьес хIяжатли биалли. Бахъал халкьла бутIакьяндешличил дурадуркIути далдуцуни къадагъалати сари. Адамтани иргъули сари илди далдурцути лерилра тяхIурти чус гIяхIдешлис диъни.
Шила бекIла гъай хIясибли, шила хозяйствола продукция дурайути мерличибти адамтас зарал бетхIерар. Гьачамлис сабухъ бурчес ва ил дура арбихес жявли саби. Къадагълуми аги-кьяйда къулайдиайчи дузахъули дирар.