Гьалабван, Даха­даев­ла район­на бекI Жа­руллагь ГIя­­­маровли Ев­­­ропала Бу­сур­­­мантала маж­лис­ла вакилти Бос­­ни­­лизивадси Сеад Ше­хич ва Гер­це­го­ви­на­лизивадси ГIяли ХIя­жи­му­­ра­дович (ил Санжила шили­зи­вадси сай) кьа­­бул­бариб.

Гьунибаъни гьалмагъдешла аги-кьяй­дализиб бетерхур. Бал­буцлизир бутIа­кьяндеш дариб муниципалитетла руко­во­дительла заместитель Алена ГIяб­дуллаевани, районна бекIла кумекчи Рабазан НухI­кьадиевли, Кубачила шила бекI ГIяб­дусалам Куртаевли, ИцIа­рила шила вакилтани. Гьунибаъниличиб хIербарибси масъалари Боснила ва Герцеговинала вакилтала гьаннала гIергъи дахадаевлантачил узидешла ва гьалмагъдешла бархбасуни кадилзахъниличила. Илкьяйдали, туризмала бетуцлизирра вягIдурти кьабулдариб.
ГIяхIли Кьара-Кьурешлизи, Кубачила, ИцIарила, Санжила шимазира бякьун. ГIяхIлас гьуни чебиахъусини мер-муса­ли­чилара дубурлантала тарихла баян­тачилара чебетаахъили бу­риб.
Кубачи бякьунхIели гIяхIли шила дайлабси кIялгIялизи ва художественный комбинатла музейлизи гьаббакIиб. Илдас дебали гIяхIдизур лерилра чедаибти секIал, хаслира Надир-Шагьла шушкаличи халаси пикри бяхIчиаиб илдани.
ИцIарила шилизи аркьу­хIе­ли гIяхI­ла­ни букIунала хин­кIала тIемра багьур. Дубурла мер-мусаличиб белгьунси масла диъличил хинкI бахъ бизисира, тIягIямласира бираргу. ИцIа­ри­лан­та­ни биалли мирхъила варъа гьалаби­хьиб.
Дубурла жагати мер-мусаличибси ши­ ва иларти архитектурала тамашала та­рих­ла бикьруми республикализирра камли къаршидиркутигъунти сари. Ургарти даршдусмала дургъбала манзиллизиб тIаш­батурси республикализибра халасигъуна кIялгIя, къалала гъятIбиълуми, жяв заманала хIябри, шурмазир дарибти суратуни, гьалабла шила кабиз дахъ тамашадизурлири гIяхI­лас. Амма илдас имцIали гIяхI­дизурти ши-алавти унхърала ва хъумала мер-муса сарри.
ГIяли ХIяжимурадовра Сеад Шехичра, хьурали башули, Санжила шилизи бякьун. Ил ГIяли ХIяжимурадовла ши са­би. Гьуни гьарахъсири, ам­ма тамашаласири. ГIяхIли хIяй­ранбариб иларти жагати мер-мусали ва духълумани.
Санжила шилизи укьес чIянкIли кьяшла гъярцIа гьуни саби лебси. ГIяхI­лас гьуни чебиахъусини бурни хIясибли, ила машинала гьуни барибси ахIен жагати мер-муса зая­хIе­ди­ахъес багьандан.
ГIяхIлани ду­бурла мер-мусаличила ва иларти жагадешуначила чула пик­руми дуриб. Илдас Дахадаевла районничила жузи пешкешдариб. Ишдус августла ахирличиб дурабуркIуси районна юбилейличира илди жибариб муниципалитетла руководительли.