ХIера, шакалра хIедикили ар­дя­кьун 11 дус. ХIуша цаи­бил класслизи дакIибси бар­хIи бусягIятван гьанбиркули саби. Дигулра гIям­рула ва багьудлумала дякь хIушала шямван бархьсили уббухъи, лерилра ур­кIила мурадуни ва пикруми-кьасани дет­ер­хурли!

Ну илкьяйдали дугьарилзулра нушала школала 11 класс таманаибти дурхIначи, дебали гIяхIти ва гьар баркьудилизиб гьабкьяти сабхIели. Мурталра илдала шаласи класслизи ну уркIила ахъси гьавличил рашули рираси. СенахIенну гьарил дарсличи илдира ункъли хIядурбирухIели ва багьудлумачи гъирачебтихIели.
ГIяйшат Жалилова, Марьям ГIисаева, Раи­сат Мирзаева ва Муслим Чираганов – иш­дус 11 ибил класс таманбарибти дурхI­ни­. Ур­кIи­ла ди­гиличил дурулра илдала уми, се­­на­хIенну ну­ша мугIяллимтас илди ахIер­ти­ли бе­таур­хIе­ли.
Школализир дурадуркIути далдуцуначир мурталра илдани жигарла бутIа­кьян­деш дири, илди ахъси даражаличир детерхахъес багьандан, чули бирусигъуна кумек гIеббиахъи. Илала дурабад, районна ва республикала даражала олимпиадабачир бутIакьяндеш дири, гьаларти мерани дуцили, гIяхIти хIясилти чедиахъи.
Ил класслизибти дурхIназибад хаслира декIарли бурес дигулра ГIяйшат Жалиловачила ва Марьям ГIисаевачила. Илди бехIбихьудла классуначибад школа таманбарайчи «шула» кьиматуначилцун бучIути саби. Балулра, чули чеббикIибси чебяхIси багьудила учреждениебазирра илдани тяп илдигъунти кьиматуни кайсни ва лайикьси санигIятличи бегIбирни. Баркалла биаб гьарра шайчибад пагьмучебти, малхIямти ва уркIи аргъибти рурсби абикьурти бегIтас.
Гьунби гIяхIдираб, ахIерти! ГIямрулизир гьарбизуницун ва сархибдешуницун диаб! ХIушала разити ва шалати уркIби селилра яра чилилра хумармадараб!