Нушани балуливан феральла 21 — лебрилра миллатунала мезанала БархIи саби. Нушала республикализирра гьар дус ил БархIилис хасдарибти гIяхIцад декIар-декIарти далдуцуни дурадуркIути сари.
Гьайгьайрагу, студентунала жигарла бутIакьяндешличил халати шадлихъуни детурхар ДГУ-лизир ва ДГПУ-лизир. Нушала гIядатуни тIинтIдирнила бегIлара дигуси ва мягIничебси байрамлизи халбирули дирехIе ил нушанира, сенахIенну Дагъиста мезанала отделение таманбарибти имцIаливан нешла мезла мугIяллимти бетарули бирар. Гьайгьайрагу, балугълахIедиайчи нушани пикрихIедирути миллатла дахъал хасдешунала, нешла мезла ва культурала кьадри иргъес, илди нушала гIямрула делхъхIеделхъути бутIни диъниличила балес нуша дехIдирхьулра филологияла факультетлизир дучIухIели. Мекелли халаси асарбирули саби ил шайчиб хIянчи бархьли тIашбатурти нушала преподавательтанира.
Илкьяйдали гьар дус имцIабикIули саби ил БархIилис хасдарибти декIар-декIарти далдуцуни дурабуркIути шагьуртала школабала лугIира. Илра дебали дигеси саби. СенахIенну илди шагьарла дурхIнала нешла мезличи иштяхI алкIахъуси гьаликIлира детарар.
Расул ХIямзатовла уличилси Миллатла библиотекала бузерира миллатла мезличил ва литератураличил цIацIали бархбасунси саби. Иларра нешла мезла БархIилис хасдарибти конференцияби дурадуркIу, макьалаби ва жузи цаладяхъили, выставкаби гьаладирхьу. Халаси хIянчи дурабуркIули, студентуначил рарх уржили рузуси, даргала мез, поэтуни-писательти, культура дагьахъес ва илди хъумхIертахъес мурталра чекаризурси нушала Салимат ХIяжиевас баркалла хIейкIесра хIейрар. Чи иличи дугьаизалра, илис кумекбарес мурталра хIядурли рирар. Ил агарси замана студентунас библиотекала жаняхIлизи абацIесалра хIейгахъу. Ишдуслизир илала кумекличирли чумра машгьурти даргантас хасдарибти шадлихъуни дурадеркIиб.
Мезличила гъайдикIахIелли, нушала мез дебали жагати ва давлачерти сари. Илис бикьридеш дирули сари республикацунра ахIи, лебилра улкара бархли машгьурбарибти даргала поэтунала назмуртани, писательтала произведениебани. Илцадра умути, чедетаибти, жагати, мурхьси мягIна бухIнабуцибти дугьбачил каргьурти илдани адамла уркIи кIантIибирахъу. Амма мезла жагадеш аргъес багьандан илди ункъли далес гIягIнили саби. Адамтани гьар бархIила гIямрулизир мезла авал бутIала ца бутIалра пайдаладирули ахIен. ЦацабехIтас «Селичирли декIардулхъули илди, илцадра жагаси се леба дарган мезлизиб?» или гьанбиркули бирар. Мезла жагадеш аргъес багьандан гъайикIес, дарган мезли делкIунти газетаби-журналти, жузи дучIес чебиркур. Нешла мез нушаб хала бегIтани букьурли батурси дунъяла давла сари. Илданицун сай адам дунъяличил тянишвируси, адамтачи дигичеввируси. Илди далес, умули дихIес нушала чараагарси чеблара саби.
