Кьанни биалра, баиб набчира февральла 18-личиб дурабухъунси «Медицина Дагестана» бикIуси газета. Дагъиста бурибти тухтуртачила белкIани сунезир дурадулхъули диъни багьандан, мурт къаршибикалра, нуни ил газета иштяхIличил бучIуси саби.
ХIера, бусягIят нуни бучIуси номерлизибра нуша, «Замана» газетала агьлу, бурес хIейэсли разидарибси макьала леб. «СанигIятлис мардеш багьандан» саби ил макьалала у. Ил макьала нушала газетала рахъхIила юлдаш, чеалкIути наслубала рурсбани сунечибад гIибрат касеси гьарли-марси дубурлан хьунул адам ГIяйшат Кьурбановна Бибалаевачила саби.
ГIяйшат Кьурбановна акIубси сари 1947 ибил дусла апрельла 7-личир Дахадаевла районна Трисанчила шилизир. Илини Дагъиста медицинала училище, ЧебяхIси политикала школа ва Москвала юридический университет таманаибти сари. 1974 ибил дусличирад рехIрихьили, хIябал дус камли байхъала даршдус ил МяхIячкъала шагьарла кIиибил номерла БиштIатала поликлиникала халалгъуна (главная) медсестрали рузули сари.
Илала гьарилра шайчибад пагьмучебси ва асилси бузери нушала хIукуматли ахъли кьиматлабарибси саби. ДР-ла ва РФ-ла дахъал ХIурматла Грамотабала ва умала дурарад, илини сархибти сари СССР-ла шабагъатунира: СССР-ла арадеш бихIнила Отличник, бузерила Ветеран, СССР-ла 4-ибил даражала донар ва СССР-ла арадеш бихIнила рурибси хIянчизарла у.
Иличибра ахъси цархIил у ца сабри итхIели нушала хIукуматлизиб лебси. «ЧебяхIси, цIакьси Советский Союз» («Великий, могучий Советский Союз») пашхIебехъубли биалри, ГIяйшат Кьурбановнани ил ура сархес асубири, сенкIун ил дубурлан хьунул адам 30 дус гьалаб бехъубси Совет хIукуматлис гьаннара марли лерал. ХIушани ил чебаэс дирудая ГIяйшат Кьурбановнани делкIунти публицистикала макьалабазиб (Ил Россияла журналистунала Союзла член сари). Илди макьалабазир илини сегъуналра урехи агарли чедиахъули сари политикализибти хIяжартала хатIаби. Илди балтIули, илдачила илини гьарилли бакьесли, ахъли бурули сари.
Писатель сарлин, ГIяйшат Кьурбановна Бибалаева чумал хабуртала сборникунала авторра сари. Нушани иштяхIличил дучIули дирехIе илала уркIи-уркIиларад дурадикибти белкIани. Ил Россияла писательтала Союзла членра сари.
ЦагьатIи секIалра ишаб гьанхIебушес хIерирус. Бахъли-декIар балули ахIен, ГIяйшат Бибалаева искусствола ва литературала меценат риъниличила. Илини арцличил кумекбируси саби газетаби ва журналти дурайахъес (газета «Дагестанская жизнь» ва цархIилти). Гьар дус «Замана» газетала 15-20 экземпляр къулбасдарили, биштIатала поликлиникализиб бузутас дуртIути сари.
Ишди бурхIназир, нушала газетала гъамси юлдаш ГIяйшат Кьурбановна Бибалаева цагьатIи халаси уличи ва шабагъатличи лайикьрикиб. Илис лебил Россияла жамигIятла шабагъатуни ва ахъти уми лугуси «Гражданское общество» МОО-ла комитетли «Россияла хIурматла гражданинна» ура лишанра дедили сари.
Нушани ГIяйшат Кьурбановна сагаси шабагъатличил уркIи-уркIиларад мубаракрирулра. Нушани дулгулра илис арадеш, хIянчилизир сархибдешуни ва гIямрулизир гьарбизуни. Арадеш булгулра илала урши-рурсилисра ва илдала баркьибтасра.
