Вавни халализи да­хъал ранганала ца­ла­дяхъялли, ил жа­гаси бетарар бикIули бирар халкьлизиб. Гьайгьай, рес­публикала халкьлизи мягI­ни-хIял далахъути ор­ган­тира илгъуна халаличи ме­шу­дир­кути сари. СенахIенну илаб бузули саби республикала ле­ри­лра миллатунала вакилти. Ре­дакциябазиб халасигъуна ва гьабкьясигъуна саби «Да­гес­­танская правда» газета. Илис бекIдешдирули сари пагьмучерси ва лебтанилра халаси хIурматбируси маш­гьур­си журналистка Бур­лият Ток­­болатовани.

Рузули калун Бурлият Мовсаровна Дагъистан Республикала печатьла ва багьахънибала министрлира.
БусягIятра «Дагестанская правда» газетала бекI редакторли рузули сари ва бахълис гIибратли ретаурли сари.
Бурлият Токболатова акIубси сари 1956 ибил дусла мартла 24-личир Хасавюрт шагьарлизир. 1979 ибил дуслизиб илини Москвала пачалихъла культурала институт таманаиб. ВецIал дусцадхIи Дагъиста жавабла къуллукъуначир рузули калун. ГIур «Профсоюзная трибуна» газетала корреспондентли рузескарииб. КIинайс «Диалог» газетала бекI редакторла заместительли ва гIур бекI редакторли рузусири.
2007-ибил дуслизир «Дагестанская правда» газетала бекI редакторла заместительла хIянчи хъарбарибсири. 2014 ибил дусличирадли ил газетала бекI редакторла къуллукъуни дузахъутири.
Бурлият Токболатовала сабухъчебси бузери пикрила дураб кахIелун ва ил пачалихъли ахъли кьиматлабариб. Ил ДР-ла Госсоветла, ДР-ла Пра­ви­тельст­вола ХIурматла Гра­мо­та­­бачил шабагъатларарибси са­ри.
Россияла журналистунала Союзла член Бурлият Мовсаровна «Дагъистан Республикала культурала рурибси хIянчизар» ибси уличи лайикьрикибси сари.
Гьанна Бурлият Токбо­латова халаси хIурмат­личил пайдаларикIуси редак­тор­цун­р­а ахIи, ишхIелла манзиллизир риэсил пагьмучерси ру­ко­водительра сари, суненира бузериличил дархдасунти гьамадли ахIенти ма­съул­ти устадешличил ирзуси. Дубурлан рурси мурталра къайгъилизир рирар республикалис, илаб хIербирути адамтас багаласили риэс, риуб­сигъуна халкьлис гIяхIдеш бирес. Дубурлантала гьаларла дурхъати гIядатуни чеалкIуси наслулизи гIерасахъес, илдала игитси ва сабухъчебси бузериличил сархибти чедибдешуни ил­да­зи ункъли дяркъяхъес, иш­бар­хIила гIямру лертиван чедетаахъили сипатдарес газетала бяхIяназир ибкьли бузули саби Бурлият Мовсаровна ва илини бекIдешдируси коллектив.
Б. Токболатова дахъал конференциябала ва съездунала делегат, журналистунала премиябала лауреат сари.
АтхIебла малхIямси тIа­би­гIятли Дубуртар Улкалис сав­­гъатрарибси пагьмучерси рурси акIубси бархIиличил «Замана» газетала агьлулира ур­кIи-уркIиларадли муба­рак­ри­рули сари. Илала гIям­ру­ли­зир гьарбизуни, бузерилизир сархбидешуни диаб. Дерхъаб хIела къугъати гIямру, хIур­матла Бурлият Мовсаровна!