Нушала рес­пуб­ли­кала гьарил шко­ла­лизиб халаси хIярп­личилти учительти лебти са­би. БусягIятла замана гIям­ру­ла халадешличибли ил­ди хIебузули хьалли, чули бу­чIа­­хъули калунти дурхI­на­ни ва барх бузутани ур­кIи­ла­ ва­надешличил даим гьан­бур­шули бирар. Ил­ди­гъунти пе­дагогунани чула гIям­рулизиб лайикьси мер буц­ниличила, санигIят чебби­кIахъес кумек­барниличила, гIям­рулизир пай­даладиэсти на­сихIятуни дед­ниличила ва чус гIибратли бе­таъниличила дяхI­­л­ичиб пиш­бяхъниличил гьан­­биркахъу.

Ишдусла январьла 23-личиб бехIбихьибси лебил Россияла «ГIяхIси сут бархIи» хIя­­ракатлизиб Дагъистанна ба­гьудила учреждениебани бу­тIа­кьяндеш дариб. Илгъуна балбуц бегI гьалаб саби дурабуркIуси ва челябкьлализиб ил гIяхIси гIядатли бетарар. Балбуцла мурад — дурхIни саби гIяхIъулатала баркьудлумачил тянишбарни ва чула хьул хIясибли, хIяракатлизи битIакIни. Школабала дурхI­на­ни ва студентунани ил балбуц халаси иштяхIличил гIеб­буциб. Шайчиб кахIелун Мя­хIячкъалала 8-ибил лицейра. Чедиб гьанбушибси балбуц­ла дазурбазиб дурхIнани «Учительлис дигиличил» би­кIу­си саби гIяхIъуласи сиптали­зир бутIакьяндеш дариб. Бяркъла шайчирси директорла заместитель З.Акаевала бекIдешлиуб 7-ибил ва 9-ибил классунала дурхIни ДР-ла рурибси учитель, педагогикала бузерила ветеран Аминат Чамсулвараевначи гIяхIладли бякьун. Школализир гIяхIцад дус­мазир рузули, дурхIнала багьуди гьалабяхI арбукнилизи халаси пай кабихьни багьандан, гIяхIлани илис баркалла багьахъур, илкьяйдали дурхIнани педагоглис хIяжатси кумекра гIебаахъиб.
ЧебяхIси категорияла учитель Аминат Чамсулвараевнани школализиб 62 дус хIянчи бариб. Илар рузуси замана, илини декIар-декIарти далдуцуначир, конкурсуначир жигарла бутIакьяндеш дирутири ва гьаларти мерани сархутири. Илди дусмала духIнар респуб­ликала шимала, шагьуртала учительтас нешла мезла гIяхIцад гьаргти дурсри кадихьиб. 1990 ибил дусличирад 2018 ибил дусличи бикайчи учительтала санигIятлашалти ус­тадеш ахъдурцуси институтличил бархбасуни дузахъули калун.
Чучи пикри бяхIчиаъни — хъули кабиибти педагогунас чараагарси саби. Къайгъи дакIубарни, гIяхIладли гьав­вакIни адамтас разидеш бихуси гьамадси баркьуди саби. Гьайгьайрагу, гIяхIцад дусмазив бамсриагарли узуси педагог халаси хIурматличира лайикьиркуси сай. Аминат Чамсулвараевначи дурхIни гIяхIладли гьаббакIни — илала хIурматбарни саби.
Бархьли буралли, сут бар­хIицунра ахIи, гьарил бар­хIи гIяхIси бетаахъес къайгъибирес гIягIниси саби. ДурхI­ни биш­тIали лебай, саби гIяхIъу­ла­ли цархIилтас кумекбирахъе­с бурсибаралли, илди челябкьлализиб гIяхIти гIядатуни даимдирутили бетарар.