Гьалавван, «Дагъистан» РИА-лизив Дагъистан ­Рес­пуб­ликала юстициябала минист­рла заместитель Сергей ­Кара­чен­цев ­рес­публикала газетаби-жур­налтала редакциябазиб ва ­теле­виде­ниебазиб бузути журна­лис­ту­начил гьуниваиб.

­Балбуц бузахъулри «Дагъистан» РИА-ла хIянчизар МяхIяч ­Вердиевли. ­Гьунибаъниличир гъай детаур ишбархIилизиб ­Дагъистайзиб ­коронавирус тIинтIхIебиахъес багьан­дан юстицияла хIянчизартани дирути къайгъначила. Илкьяйдали респуб­ликала лерилра бетуцуни цадиубли ил изайчи къаршидеш дирухIели зягIип­биркутала лугIира илцад-декIар ахъ­бикIули ахIен. БурахIелли, Роспотребнадзорл­а Уп­равлениела ­баянти хIясибли, иш­бар­хIилис дуги-хIерила бухIнаб ­республикализиб зягIипбикибтала лугIи 127 адамличи халбирули саби, ­сагъбиубтала — 55 адамличи. Республикала мер-мусаличи коронавирусла изала тIинтIбирахънила бетуцуначи къаршидеш дирнила ­шайчибси Оперативный штабли балахъули саби декабрьла ­2-личибадли бехIбихьили, ЗАГС-ла заллизиб 10-личиб имцIали адам цалахIебиркахъес.Коронавируслизибад мяхIкамдеш бирнила тяхIяр-кьяйда дузахъули диалра, дяхIликалаби агарли чучи башутира ­камбирули ахIен. Иличибли изала тIинтI­бирнила урехи алкIули саби. ­МяхIяч­къалализир гьар бархIи 5-6 загс дирули дирар. Амма нушала респуб­ликализиб имцIали магьар дирхьни­личи чекабизурхIели, ЗАГС мурт-биалра барес вирар бикIутира камли ахIен. ВиштIаси акIубхIели имцIали хIяжатбиркули бирар ЗАГС-ла документ. ЗАГС-лизи дугьабизес бирар электронная почта ва ­«Пачалихъла гIяхIдешунала» портал пайдаладарили. ­Илкьяйдали дугьабизуртала мурад бирес хIядурли бирар илабти хIянчизартира.  С.Караченцевла гъай хIясибли,  ДР-ла юстицияла ­Министерстволичи хъарбарили саби изала тIинтIхIебиахъести тяхIурти чедетаахъили дузахъес. «Илала дурабадлира, республикала шагьуртала ва ­районтала ЗАГС-ла заланазир мяхIкамдешла далдуцуни дурадуркIес хIяжатти лерилра гIягIниахълуми лер. Гьаннаван ахIи, бегI гьалаб коронавирус тIинтIбиубхIелира ­нушани чекадизурли изайчи къаршидеш дирнила тяхIурти ­дузахъутири. ЦацахIели полицияла хIянчизарти бархли ­жибирутири магьар дирхьути жагьилтала тухумти паргъатбиахъес ­багьандан», — буриб министрла заместительли.Балу-балули коронавируслизи хIебикес багьандан дузахъес хIяжатти бетуцуначи чекабизес хIейгути лебли биалли нушани балахъули дирехIе гIядлу-зегъа далтахъути органтази. Архивлизи башути адамти камли цалабиркахъести тяхIуртира далдурцули сари. Бархьси саби, гьарил адамли къадагъабачи цаван пикри бяхIчииули ахIен, амма лебтачилра иргъахънила хIянчи дурабуркIес хIяжатлира саби.Республикала муниципалитетунала ­цалабяхъуназирти 15 архив гIе­кIибтири коронавирусла изала бегI гьалаб тIинтIбикIескабиибхIели. Илаб бузути хIянчизарти имцIаливан ­коронавируслизи бикибтири. Гьанна гьарил организацияли чула бузери гьунчибушес къайгъни дакIудирули сари ва илди адамтала ­мурад бирес гIела битIикIули ахIен.ДР-ла юстициябала Министерствола вакил ­дагъистанлантачи дугьави­зур ко­ронавирусличи къаршили дура­дур­кIути лерилра мяхIкамдешла далдуцуни чедетаахъили дузахъес.Балбуцла ахирличир журналистунани ахъбуцибси темала черкад гIяхIцад суалтира дедиб ва илдас С.Караченцевли чедетаибти жавабтира чардатур.