Дагъистайзи духIнадерхурти къачагъунала кьукьни тIутIу-кьякьядарибхIейчирад 21 дус дикили сари.
Нушала халкьла гъабзадеш чилилра хъумхIерту ва хъумартес асухIебирар. Ил тарихлис хасдарибти чумра шадлихъ, саби гIяхIъулали бургъутачил гьунибаъниби детерхур.
Иш гьакIлизиб «Урусла шашкаби» бикIуси абз МяхIячкъалала Родопский бульварлизиб дураберкIиб. Шагьарлизиб хIербирути ва дурабад бакIибти саби гIяхIъулали бургъантала халаси кьукья лебри. Илди-ургаб хIяз бемжур ва байрамличи шурбухъун. Илдазибад гIяхIтигъунти спортсменти декIарбарес хIя-жатлири.
Илди гIеббуцес ДР-ла халкьла Собраниела депутат ГIямархIяжи ГIялиев, ДР-ла ветерантала Советла руководитель МяхIярам Алиджанов, ДР-ла миллатла политикала ва динанала шайчибси отделла начальник Александр ХIяжиев, музыкантунала Союзла председатель Хан Баширов, саби гIяхIъулали бургъутала командир МутIалим МутIалимов ва бахъал цархIилтира бакIиб.
«1999 ибил дусла августличиб ва сентябрьличиб кабикибсири ил анцIбукь. Дагъистан палакатбарес, Россиялизибад декIарбарес, нушачир чула хIукмурти дузахъес дурабухъунтири ярагълабиубти къачагъуни. Амма нушала халкьли гъабзадеш ва узидеш дакIударили, илди бячIун. Нушала Дагъиста БекIли вируси МяхIяммадгIяли МяхIяммадовичла ва саби гIяхIъулатала гIяскар бучибси СягIид Амировла къайгъначибли, нушани чедибдеш сархира. Нушала чеалкIуси наслулизи иличила багьахъес чебси саби. Дагъистан душмайзи батахънилис, Интербригадала Советла хIукму хIясибли, бургъантас «Халкьла саби гIяхIъулали бургъутала игит»-ла уми дедибти сари», — викIи М.МутIалимов абз ибхьули.
«Абзлизир бутIакьяндеш дарес Дагъиста мер-мусаличибад саби гIяхIъулали бургъанти бакIибхIели, уркIи разибирули саби», — викIи М.Алиджанов. ИмцIатигъунтани гIяхIцад шабагъатуни касибти сари. Хъумартес асухIебирар 19 дус виубси ХIяжимурад Курахмаевла гьунарличилара. Илини къачагъуначил вархваси, чумал бархIи илдас кумекбирули, илди бускаунхIели, касили илдала автомат, авал къачагъ кабушибтири. ГIелаб калунтани сайра кавшиб. ВебкIили гIергъи, илис Россияла Игитла у бедибсири.
ГI.ГIялиевли «Дельфин» бикIуси бамсри ихъуси базализиб иртнила шайчибси абз абхьес чесиб. Илкьяйдали, илар мушулбашнила абзличилара гъай детаур.
ХIязанани адамти уржахъули, 21 дусла гIергъира цаличил ца къаршибиркахъули, чула гьанбикуначила хабурти дурахъули сари. Абзаназиб чедибикибтас савгъатуни, грамотаби, арцла шабагъатуни ва медальти дедиб.
Хадижат ГIямаровани, нуни, МяхIяммад ХIямзатовли, Арсен Азиевли, МяхIяммад СягIидовли, Мухтар МутIалимовли… гьаларти мерани дуцира.
1999 ибил дуслизив «Интербригада»-ла генерал-майорли вируси М.МутIалимовли гьарил бутIакьянчис баркалла багьахъур.
Берхъаб Дагъиста багьадурти! ВатIан батахъес къарауйчибти, къаркъаван чIумати гъубзни. Саби гIяхIъулали бургъутас хасбарибси дила назмура газета бучIантас гьалабирхьулра:
Тимурла гIяскуртаван
Дагъистан хараббарес,
Чевхъун гIуррара душман
Дила халкь лугъри барес.
ХIейалра буйрухъикIул
Дурабухъун гIяхIгъубзни,
Саби-сабил муштарли
Къирбарес къачагъуни.
Ярагъли бегIбиубти
ГIяндбикIули някъбани,
ДяхIяиб дубурланта
Душмайчи балагьуни.
ХункIлизирти тIулбиван
Миллатуни уржибси,
СабхIели дила ВатIан
Ахъиэс хIейуб душман.
Кахси, гъаргъси душмайзи
Чедаахъиб гъабзадеш,
Бемжурси гъазализир
Дагьур чула усалдеш.
Дагъиста дурабтара
Аргъили кахси хабар,
Чарбухъун хIеб чатIниван
Батахъес дурхъал ВатIан.
УвяхIси къачагълизи
Чедаахъиб асилдеш,
Жан кадурхухIелира
ХIедагьахъур кIантIидеш.
ДакIудариб гIяхIгъубзна
Гъабзадеш гъалбецIливан,
Къирвариб ва дугIаиб
Дагъистайзивад душман.
Дагъиста асил гъубзна
Сархиб гIурра гьунарти,
Темирланна гIяскарван
Беркьахъиб вайнукьаби.
Россияла вегIбекIра
Тамашавиубсири,
Дубурлантачи диги
Илар цIакьдиубтири.
Нушала халкьлис кьимат
Кабатур гIярасайли,
Гьунартас орденти гиб
Улкала Президентли.
