МяхIячкъалализибси Гьал­магъ­деш­ла Юртлизиб мер­ла­ба­рибси Россияла халкьанала гьалмагъдешла Музейлизиб августла 27-личиб цагьатIи стенд (суратуначилси ва мил­латла ваяхIличилси уркьули) абхьиб, «Республика Беларусь», суне­нира Бе­лоруссияла тарихличила ва куль­тура­ли­чила буруси. Илкьяйда илаб Вла­дислав Цыдикла суратунала «Беларусь ишгъунали чебиулра» бикIуси выставкара абхьиб.

Дагъиста миллатунала политикала ва динанала къуллукъунала шайчибси Ми­нистерстволи ва «Уздени Дагестана» жа­мигIятла организацияли хIядурбарибси ил балбуцлизир бутIакьяндеш дариб министр Энрик Муслимовли, Россияла МИД-ла МяхIячкъалализивси вакил Амирхан МяхIяммаддадаевли, Гьалмагъдешла Юртла директор Аида ГIялиевани, «Уздени Дагестана» жамигIятла организацияла председатель Керимхан Умахановли, ДР-ла НКО-ла бузерила дурусбиркахъуси Советла председатель Шамил Хадулаевли ва цархIилтани.
Балбуц ибхьули, Дагъиста миллатунала политикала ва динанала къуллукъунала министрли бурни хIясибли, Россияла халкьанала гьалмагъдешла Музейлизиб абхьибси стендли Белоруссияла халкьла тарихличила ва культураличила гьариллизи буру.
«Дагъистайзиб Белоруссияла гIямзи абхьнили нушала халкьанала бархбасуни уржахъу ва гьаладяхI арку», — викIи ил.
ДР-ла миллатла политикала ва динанала къуллукъунала шайчивси министрла гъай хIясибли, кIелра регионна адамти цабалги саби, юлдаш улкализиб чула кIиибил хъали баргили, бахъал дагъистанланти Белоруссиялизиб бузули хIерра бирули саби.
Балбуцла дазурбазиб Пачалихъла Думала азадти пачалихъунала Союзла къуллукъунала шайчибси Комитетла председательла заместитель Умахан Умахановла телеграмма белчIун. Телеграммализи цабутIаван белкIири: «Беларусь Республикала стенд ва В.Цыдикла «Беларусь ишгъунали чебиулра» выставка абхьни, республикала даражала мягIничебси анцIбукьцун ахIенну, Дагъиста халкь, Россияла цархIилти халкьаначил барх, узбигъунти пачалихъунала рухIлашалти хьулчни цадирахънила лишаннира бетарниличи чIумали вирхулра».
ГьанбуршехIе, выставка «Беларусь – Дагъистан: рухIлашалти тухумдеш» бикIуси проектла дазурбазиб дураберкIибсири, сабира Россияла ва Белоруссияла халкьанала цадешла БархIилис багъишлабарибси.
Илкьяйда, балбуцла дазурбазиб Россияла халкьанала гьалмагъдешла Музейла хIянчизар Анжелани гIяхIлас дебали тамашала ва давлачебси бухIнабуцличилси экскурсия дураберкIиб. Илини нуша Дагъиста халкьанала жявхIелила ваяхIличилцун ахIи, Азербайжан Республикала, Казахстанна, Киргизияла, Узбекистанна тарих ва культура чедиахъути гIямзурбачил тянишдарира, илкьяйда Белоруссияла сагаси гIямзиличилра.