Августла 8-9-ибти бурхIназиб Дагъистан Республикала ва Чечняла Республикала мер-мусаличиб «КIел мижит» бикIуси дуцIла абз бетерхур.
Кункси атлетикала спортсментани бутIакьяндеш дарибси балбуц ДР-ла динна къуллукъунала ва миллатла политикала шайчибси Министерстволара «Киргу» вачарла юртла кумекличил ЧР-ла печатьла ва багьахънибала Министерстволара икьайчил дураберкIибсири.
Спортсментани МяхIячкъала шагьарлизибси Центральный ЖумягI-мижитличибад бехIбихьили Грозный шагьарлизибси ГI.Кьадировла уличилси «Чечняла уркIи» бикIуси мижитличи бикайчи 170 километрла гьуни дуцIли ахъиб. Илдани ЖумягI-мижитла имамла шайзибад Грозныйлизибси мижитла имамлис дурхъаси Кьуръан пешкешбариб.
Балбуцла мурад сабри кIелра республикала миллатла бархбасуни дебадиахъни, гIяхIти гIяхIялдешла ва унрадешла гIядатуни гьаладяхI дашахъни, кIелра регионна халкьла спорт ва культура машгьурдарни.
