«Далай чум дилчӀаслира
Далай гӀяхӀна гъвобзалис,
Къийин дибил мусанир
Улхъанну даршлизи ца».
ГӀямарла Батирай
ХӀурхъантани чум-чумра гӀяхӀгъабза абикьур, ВатӀан къияйзи бикибхӀели, чула гъабзадеш чедаахъибти. ВатӀа жи аргъили, ил батахъес дявила авлахъличи арбякьун 575 хӀурхъан. 175 — чархӀебухъун. Чарбухъунтани бурули бири, дявила замана чедир дурибти Батирайла дугьби багаладиъниличила.
Чарбухъунтала лугӀилизив левсири ЧебяхӀси ВатӀа дергъла жигарчевси бутӀакьянчи Сулайбанов Ибрагьим БяхӀяммадовичра. Ил ца кьяш агарли хъули чарухъунсири. Дубурлантала ургав халаси хӀурматла вегӀ гӀяхӀгъабза адам сайри ил.
1993 ибил дуслизив Ибрагьим 82 дусла гӀямруличив шалгӀевухъун. Амма узи-уршили, шантани хъумуртули ахӀен илала шаласи сипат ва дергълизир дакIударибти гъабзадеш.
1941 ибил дуслизив, дергъ бехӀбихьили чумал бархӀи ардякьунхӀели, илра ургъес арякьунсири. Дергъ таманбиайчи ургъули калун. Ил ургъусири Закавказла фронтла 56 эсил гӀярмияла 14 ибил мотострелковый ва 3-ибил стрелковый корпуслизив. Калун Одессализив, Крымлизив, Севастопольлизив ва Кавказла бекӀлидиубти дубуртала сиртличив. Дахъал гьунарти чедаахъиб ва къияндешуни ахъиб. Илала гъабзадеш кьиматладирули, Ибрагьим дахъал декӀар-декӀарти медальтачил ва ордентачил шабагъатлавариб: 1942 ибил дуслизив – ХӀунтӀена циривла орденничил (СССР-ла Верховный Советла Президиумла хӀукму хӀясибли); 1942 ибил дуслизив – Дергъла ХӀунтӀена байрахъла орденничил; 1943 ибил дуслизив – ЧебяхӀси ВатӀа дергъла 1-ибил даражала орденничил; 1944 ибил дуслизив – Ленинна орденничил (бегӀлара чебяхӀси СССР-ла орден); Гъабзадеш багьандан (1942, 1944, 1991 ибти дусми), Дявила сархибдешунас (1943 ибил дус), Кавказ батахъни багьандан (1944 ибил дус), Германияличибад чедибдеш сархни багьандан (1945 ибил дус) медальтачил.
Дергълизивад чарухъунхӀели ил узули калун колхозлизив, кӀинайс ХӀ.ТӀалхӀятла уличилси совхозлизив.
Иличил декIар-декIарти хӀянчурбачив варх узули нура калунра. Ил багьандан ил нуни гӀяхӀил валуси, ва нуни халаси хӀурматбируси адам сайри.
Мурталра адамтачи дигичевси, уркӀи сахаватси, чис-дигара гӀяхӀдеш барес гьалакси, бузери дигуси ва урехиагарси гӀяхӀгъабза сайри Ибрагьим. Гумайлаб учибикибти шантанира ихтилатлизив мурталра ил уркIила дигиличил гьануршу.
Ил гӀяхӀси дудешра сайри. Илини сунела ахIерси Мариямличил 2 уршилис ва 4 рурсилис гӀяхIси бяркъ бедиб, халабаахъиб. Илдира бегӀтиван дяхӀ шалати, бузерилизибад уруххӀекӀути адамтили бетаур.
Ибрагьим Сулайбановлис ва 575 хӀурхъайс ишди дугьби хасдирулра:
ГӀямрула къантӀси гьуни
ЯхӀличил ганзбарибти,
Ахъ хӀурхъла булан хӀурмат
Сабурличил сархибти.
ЧеалкӀуси наслулис
Гьанбуршули мисаллис,
ХӀушала халал гьунар
ХъумхӀерту гӀямрулизиб.
Чумра акӀуб дила ши
ХӀезиб гӀяхӀгъабза урши,
Къияндикиб замана
Даршлизи ца булхъанти.
