Сагаси изай лебил халкь хъулрази пяхъбикахъиб. Дахъал къияндешуни хиб нушаб коронавирусли.
Амма хӀерая алавчарси тӀабигӀятличи. Сецад умудирулил хӀуркӀби, урхьни, адамти шадиббашути ва тӀабигӀятла цархIилти мер-муса. Венецияла шиннизи дельфинти чардухъи сари, сенахӀенну шин чилилра нясдирули ахӀен. Китайла чедибси мурталра нясси, гавли ва заводунала гӀела-гьаладиклумани бицӀибси гьава вацӀализибсиван умубиубли саби. Пикридухъенаягу, адамтани сецадла халаси зарал бирулил алавси тIабигIятлис, кӀел-хӀябал базла бухӀнаб гьава илцадла умубиубли биалли. Сегъуналра кумек гӀягӀнили ахӀен тӀабигӀятлис сунени саби умубарес. Илис биули саби, адамтани нясхӀебиралли. Гьанна Китайлизиб изала беткахъили саби, ва адамтани, заводунази, хӀянчурбачи чарбухъи, гӀурра гьава нясбирес бехӀбирхьур.
ЦархӀил шайчивад пикриухъалли, дунъяличир кадиркути лерилра анцIбукьуни, ил изала, белики, нушала Ванзала цӀумъала диэс или гьанбиркули саби. Ил адамтани чула авараагардешлис ва пикриагардешли бубкӀахъули саби. Адам сунес дигуси касили, гӀур лябкьуси заманаличила пикриулхъули ахӀен. Илкьяйда Ванзала аги бархIиличи-бархIи вайтӀабиркур. Ил багьандан биэсгу иш изалара тIинтIбиубси: адамти хъулрази дигӀянбикахъили, Ванза азадли гьигьбикӀуси, сунела «излуми агардирули», ара-сагъбиэс къайгъилизибси.
ГьатIира, ил декIси изай бахъал адамти чула бегӀтачила пикрибухъахъун, хъалибаргуни уржахъиб. ХIебиалли, илцадра вайсив, гьатӀи, ил изала? Адамти илини адаб-хIяяла, гьалмагъдешла къиликъунала кьадри балахъес бурсибирули биалли? Гьайгьайрагу, сегъуналра изала гIяхIси хIебирар, амма ил дакIубухънили нушала хIял-тIабигIятличи, дагьриличи ца шайчибад гIяхIси асарра бирули саби. Белики, коронавирус беткахъили, адамти арабиубхӀели, къиянти аги-кьяйдализир вегIла гъамтачи, мякьлабтачи акIубти диги гьатIира имцIадиэс, чули тIабигIятлис бируси заралличила пикрибухъес?
