ШалгIеббухъунси дусла ахирличиб Ахъушала район­на судла Председатель ГIяб­дуллаев МяхIяммад Нур­мя­хIям­мадовичла кабинет­ли­зиб ХIям­шимала шилизибси урга да­ражала школала 11 ибил классла авал бучIанничил гъунибаъни бетерхур.

МяхIяммад ГIябдуллаевли буриб:
— Нушаб чеабиуси наслуличила, илдала челябкьлаличила пикридикIес чараагарси саби. ДурхIнас гIяхIси бяркъ бедес, вайти анцIбукьуназибад берцахъес, илдази низам-кьяйда хIедуахъес, дагьри думкьахъути, вайти секIайчи бурсихIебиахъес нушала чебла саби. Нуни ишбархIи иша ХIям­шимала школала бу­чIанти жибарира. Илкьяйдали, цархIилти школабала бу­чIан­тачил гьунибаънибира детер­хахъурли, ихтилатуни дурадеркIес пикри лебси саби наркотикунала зарултачила илдази аргъахъес багьандан. Нушала районна судла сайт лебси саби, судлизир детурхути хIянчиличила макьалаби илара кадирхьути сари, илкьяйдали, районна газетализира багьахъниби кадирхьули дигулра, — буриб МяхIяммад НурмяхIяммадовичли.
МяхIяммад ГIябдуллаевли школала бучIантачил бяркъла шайчибси ихтилат дура­беркIиб, РФ-ла Конституция ва низам-кьяйда дуалли, сегъуна танбихI бирусилра илдази аргъахъиб.
— ЦархIилти адамтала яра пачалихъла давла бигIялли, адамличи зулму биралли, илис дяхъи баралли яра кавшалли танбихIлавируси сай. Наркотикуни, ярагъ диалли ва илди дирцалли, илгъуна адам жаваб­личи витIикIуси сай, — викIи М.ГIябдуллаев.
Школала бучIанти халаси иштяхIличил судьяни дурутачи лехIяхъиб. Илдани сабира юристла санигIят касес пик­ри­бикIниличила аргъахъиб. Ца­цабехIти бучIан­тани закон­та­чила хьардаибти суалтас кагибти жавабти чардариб.
ГIур судьяни илди районна судла заллизиб дурабуркIуси уголовное дело хIербируси судличи жибариб.
Илаб биалли, школала бу­чIантани суд бетурхути тя­хIяр-кьяйдаличи халаси пикри бяхIчиаиб.