ДурхIни миллатунала бегIлара дурхъаси давла саби. Улкала челябкьла илдала някъбазиб саби бикIути дугIла гъай ахIен. Илди урехилизи хIебикахъни, социальный бяхIчибизлизиб мяхIкамбарни нушала пачалихъла мягIничерти масъултазибад цали бетарули саби.
ДурхIни сегъунтили халабикIулил бегIтазибад, мугIяллимтазибад, тренертазибад дигахъуси саби. Халатас илди гIяхIси бяркъличи бикахъес, багьуди касахъес, гIямрула бархьси гьунчибад башахъес бурсибарес чебиркур. ДурхIначи халаси пикри бяхIчииэс чараагарси саби, хаслира тамай балугълахIебиубтачи.
Нушаб лебтасалра нушала дурхIни разитили, аратили, багьудлумачил бегIбиубтили, спортлизи ахъибтили, адаб-хIяяла къиликъуначибтили биубли дигулра. Пачалихълира илди масъултачи дяхIчиаибти проектуни ва программаби гIямрулизир детурхахъули сари. Амма, нушала дурхIнани наркотикуни пайдаладарес асубирнила урехира алкIули саби. Дила пикрили, цахIнарти цIакьаначил ил ва цархIилти масъулти арзес имканбикIур. ХIера, бара гьалабванра республикализиб наркотикуначи къаршиси хIяракат бетурхниличила гъай детаур.
«Дагъистан» РИА-лизив ДР-ла жагьилтала къуллукъунала шайчивси министр Камил СягIидов журналистуначил гьуниваиб ва ил хIяракатличила буриб. Илала гъай хIясибли, имцIаливан балугълахIебиубти дурхIначил саби иргъахънила хIянчи дурабуркIуси, сенахIенну ил кьукья гьамадли асарлиу биркухIели. Хасси хIяракатлизир республикала лерилра муниципалитетунани бутIакьяндеш дирути сари. Ил хIяракат 2017 ибил дусличибад дурабуркIули саби ва гIяхIти хIясилти чедиахъули сари.