Хайдакьла районна Хъирхъила шилизиб Украинала мер-мусаличиб дявила чебла ихъули, алхунси МяхIяммад СалихIов гьаниркахънилис хасбарибси уркьули ибхьнила балбуц бетерхур.
Балбуц ибхьули, Хайдакьла районна бекI ГI.Темирбулатовли буриб: «АхIерти гьалмагъуни, хIушанира балуливан, нуша даршуси закла удир разили хIердиахъес ва дурхIни абилкьахъес багьандан, дургъбазир ва дявила хасси балбуцлизир гIяхIцад адамтани жан кьурбандариб. Илдала хIурматбирни нушала чебла саби».
Илис гIергъи Хъирхъила шила администрацияла бекI Рабазан Арбахов гъайухъун ва цалабикибтас МяхIяммад СалихIовличила баянти гьаладихьиб.
«МяхIяммад Жалалутдинович акIубсири 1996 ибил дусла декабрьла 18-личив Хайдакьла районна Хъирхъила шилизив. Ил гIямруличи разиси, кумекличи музаулхъуси, гьамадли гьалмагъиркуси жагьси адам вири. МяхIяммад ВатIан балтахъан ветаэс хьуликIусири. Шила школа таманбарили гIергъи, 2015 ибил дуслизив Санкт-Петербургла полицияла колледжла Каспийсклизибси филиаллизи керхурсири. Ил хъараахъурли гIергъи, вягIда хIясибли гIярмиялизиб къуллукъбирес вехIихьибсири. Ишдусла февральла 24-личив Украинализиб бетурхуси Россияла дявила хасси балбуцлизир бутIакьяндеш дарахъес живарибсири. ГIямрула бурхIни кадерхайчи ВатIайс ва хъялис марли калун. Донбасслизиб дявила чебла ихъули, майла 27-личив алхун. Гъабзадеш ва игитдеш дакIударни багьандан, улкала Президентла 2022 ибил дусла июньна 11-личибадси ХIукму хIясибли, вебкIили гIергъи МяхIяммад СалихIов Гъабзадешла орденничи лайикьикиб. Хъирхъила шила дайлабси кьакьали игитла у бихули саби», —буриб Р.Арбаховли.
ГIур ВарситIла урга даражала школала директор М.Жамалутдинов, Афганистаннизибси дергъла бутIакьянчи, ургъан-интернационалист Р.Салимов, Чечнялизир кадикибти анцIбукьунала ветеран А.МяхIяммадов гъайбухъун.
ДурхIнани М.СалихIовлис ва дургъбала цархIилти бутIакьянчибас хасдарибти назмурти делчIун.
КIинайс ГIялим Темирбулатовли ва Рабазан Арбаховли МяхIяммад СалихIов гьаниркахънилис хасбарибси уркьули абхьиб.
Илкьяйдали Хъирхъила шилизи ухIнаулхъуси мерличиб дургъбазиб алхунтала хIурматлис памятникра кабизахъур. Балбуцла бутIакьянчибачил барх ГI.Темирбулатовлира сагаси памятникличи вавнала хала кабихьиб.
Балбуцла ахирличиб МяхIяммад СалихIовла хIурматбарес цалабикибтас илала дудеш Жалалутдин СалихIовли баркалла багьахъур.
«Нуни культурала учреждениелизиб 25 дус хIянчи барибси саби ва чеалкIуси наслулизир ВатIайчи диги адикьес къайгъибарира. Дила уршбира ВатIайчи дигичебтили халабаиб. Сепайда, кьисматли дила бегIлара виштIасигъуна урши кевасиб…
Миллатчиби уркIецIиагарти адамти саби. Илдачи къаршили ургъес чебиркур. Нушани улкала Президентла пикруми гIердурцулра. Ил баркьуди бархьси биъниличила ва заманаличиб дурабуркIниличила ташмишдеш агара», — викIи игитла дудеш.
Хайдакьла районна администрацияла пресс-служба
