ВатIайчи диги цIакьдирахъули

Лебил Россияла «Игитуначил ихтилат» бикIуси проект дурабуркIнила дазурбазиб Ахъушала районна администрацияла вакилти ЧебяхIси Чедибдешла дусмазир тылла хIянчизарли калунси, 1922 ибил дуслизир акIубси ГIяйшат ГIялиевачил ва 1918 ибил дуслизир акIубси дергъла бутIакьянчила хьунул Хадижат МяхIяммадовачил гьунибаиб.

Гьунибаънила сиптакарти сабри районна культурала, жагьилтала политикала ва туризмала управлениела хIянчизарти. Гьанбушибси проект дурабуркIнила бекIлибиубси мурад наслуби-ургаб ихтилатла бархбас кабизахъни саби. ХIера, илдигъунти гьунибаънибачир игитунала гIямруличила дурути хабуртани жагьил наслула ВатIайчи диги цIакьдирахъу.
АрхIяла бутIакьянчиби сабри «Ахъушала район» МО-ла администрацияла бекIла заместитель, районна хьунул адамтала Советла председатель Эльвира ХIясанхIусейнова, жагьилтала политикала ва туризмала управлениела начальник ХIясан ХIясанов, районна библиотекабала кабизла заведующая Жамиля ГIябдуллаева ва цархIилти.
Гьунибаъниличиб гIяхIлани хьунул адамтала халкьани-ургабси байрамличил ва лябкьуси ЧебяхIси Чедибдеш 75 дус бирнила байрамличил хьунул адамти мубаракбариб. «Лебил нушала районна жамигIятла шайзибад хIушаб уркIи-уркIилабадси баркалла багьахъес дигулра, хIушани дергъла дусмазиб кабихьибси къияйс. ХIушала ва хIушагъунти цархIилти дубурлан хьунул адамтала сабурли, гъабзадешли ва цIакьли сарра нуша чедидикахъибти! Нушани хIушачи пахрубирулра, хIушаб ва хIушала гъамтас чIумаси арадеш ва дахъал дусмазир даршути гIямру дулгулра», — рикIи гьунибаъниличир Эльвира ХIясанхIусейнова.
КIинайс хьунул адамти-тылла ветерантани гIяхIлас чула гIямрулизир кадикибти тамашала анцIбукьу­начила, дергъла дусмазир чули чекасибти къиян-жапаличила буриб.
Гьунибаъни ахирличи биркахъули, ХIясан ХIясанов викIи: «Гьарил ишгъуна гьунибаъниличир жагьилтала ВатIайчи дигиличила, Игитунала гьунартачила хъумартес асухIебирниличила нуша гъайдикIутира. Иличибли нушаб жагьил наслула уркIбазиб чула хъалибаргла, биштIаси ВатIа ва лебил пачалихъла тарих бяркъниличи иштяхI чебсаргъахъес дигулра. Ишдигъунти далдуцуни «наслуби цахIнадиркахъуси гумили» детарули сари. ЧебяхIси ВатIа дергъла дусмазир Нушала хала дудешунани ва нешанани чедаахъибти гьунартачила гьарил жагьил адамли балес гIягIнили саби».
Районна хIякимтани хьунул адамтас Ахъушала районна администрацияла шайзирад савгъатуни дедиб.
«Ахъушала район» МО-ла багьахънибала политикала шайчибси управление