Миллатла мезанала клубла дазурбазиб, ДР-ла Р.ХIямзатовла уличилси Миллатла библиотекала хIянчизарти мартла 4-личиб Сергокъалала районна ХIурхъила шилизи архIяличил бякьун. Шила школализиб прозаик, драматург ва тилмаж ХIябиб ГIялиев акIубхIейчирад 80 дус дикнила хIурматлис хасбарибси вечер дураберкIиб.
Балбуцлизир школала педколлективли, дурхIнани, шила культурала Юртла директор Нариман Идзиевли, музыкала руководитель ХIямид СягIидовли, илкьяйдали гIяхIланира бутIакьяндеш дариб. Вечер дарган мезла ва литературала мугIяллим Нурият ГIисаевнала бекIдешлиуб дураберкIиб ва «Дуруг» бикIуси поэмала ца бутIа гьалабихьиб. ДурхIнала анхъла биштIатира ца шайчиб кахIелун, илданира «Урунжличиб» бикIуси сочинение хIясибли, жагати делхъ чедаахъиб. Концертла программабазир жигарла бутIакьяндеш дариб МяхIяммад Айвазовли, ГIябидат МяхIяммадовани, Хизри СягIидовли, МяхIяммад Лагьмановли, ХIяжимурад ГIябдуллаевли, Наживат ГIисаевани, Басир Идзиевли, Хамис МяхIяммадовани, ДР-ла халкьла поэт Аминат ГIябдулманаповани, ХIябиб ГIялиевла цакласслан ПатIимат МяхIяммадовани, ГIяймаумахьила урга даражала школала дарган мезла ва литературала мугIяллим Зугьра Халимбековани ва поэтла тухумтани. ХI.ГIялиев пагьмучевси поэтцунра ахIи, прозализибра илини хасси мер буцниличила гьанбикахъиб. Илала творчестволис хьулчили бетаурси саби халкьла мухIлила пагьму. Даршдусмала халкьла пасихIдеш, Дагъиста пергер тIабигIят, жамигIятла гьаннала заманала масъулти –лерилра илди чедиахъули сай ХI.ГIялиевли сунела творчестволизир. Сочинениебази биалли, ЧебяхIси ВатIа ва граждан дургъбачила хабурти кадерхахъурли сай. Лирикализир фольклорла макьамти сай-вегIти секIултачил цIацIали дархдаси сари. Илала повестунала игитуни уркIи гьаргти, пагьмучебти, баркьудлумазиб сахаватти адамти саби, чула кьисмат ахIерси ванзаличил бархбяхъибти.
«ГIергъити дусмазив ХIябиб поэт-пунтчи вири. Сагадешуни алкIахъути дусмани, нуша гIерхIедуцибдешли, жагIялла бархIиличи бирхауди агнили, илала уркIи кьакьабикIахъулри. Илкьяйдали Дагъиста челябкьлаличи, нушала тарих «кабуршниличи» ил дебали децIикIули вири», — рикIи РФ-ла ва ДР-ла ХIурматла мугIяллим Жаго МяхIяммадовна.
ХIябиб МикагIилович акIубси сай 1940 ибил дуслизив Сергокъалала районна ХIурхъила шилизив. Шила школа таманаили гIергъи, ДГУ-ла историко-филологический факультет ва аспирантура делчIун. ЧебяхIси даражала багьуди касили, шилизив мугIяллимли узес вехIихьибсири. КIинайс Дагъиста жузи дурайути издательствобазив редакторли узули калунсири. Ил филологияла гIилмуртала кандидат, СССР-ла писательтала Союзла член вирусири.
ХI.ГIялиевла цаибти назмурти дурадухъунтири 1957 ибил дуслизир «Эркиндешличи» районна газетализир. Кьанниван «Ленинна байрахъ» газетализир, «Гьалмагъдеш» альманахлизир, жагьилти автортала сборникуназир дурадулхъес дехIдихьибтири. ХIябиб МикагIилович 20-личирра имцIали жузла автор сай: «ХIябал ги», «Дусла авалра манзил», «Кьанси гIебшнила бурхIни», «Батирай», «Ургубала урши», «Шуркьла кьяли» ва цархIилти. Илала «Кьанси гIебшнила бурхIни», «Шуркьла кьяли» ва «КIари кадиркуси замана» бикIути жузи Москвала издательствобазир урус мезличира шурдатурти сари.
Даргала театрли ХI.ГIялиевла «ХIязла ахир» ва «Сагаси заманала зилан» бикIути пьесаби хIясибли спектакльти гьаладихьибтири. Произведениебазир писательли сунела наслула кьисмат чебиахъули сай. Дявила дурхIядешла темаличи ва сай акIубси шила гьаннала гIямруличи дугьаилзули, илини адаб-хIяяла масъулти ахъдурцули сай.
«Ургубала урши» бикIуси назмуртала жуз багьандан ХIябиб МикагIилович С.Стальскийла премияличи (1983 ибил дус) ва «Батирай» бикIуси роман багьандан ГI.Батирайла уличилси фондла премияличи (1992 ибил дус)лайикьикибсири.
Балбуцличиб ХI.ГIялиевла жузала выставкара балкьаахъурлири. Поэтла хьунул Раисат Халимбековани, узила рурси Жаннат ГIялиевани ва Шихшунат Мутаевли вечер дураберкIибтас халаси баркалла багьахъур. Балбуц дураберкIахъес нунира халаси кумекбарира ва даргала литература гьалабяхI башахънилизи поэт ХI.ГIялиевли халаси пай кабихьниличила аргъахъира.
