Гьалабван «Кай­таги» эт­ни­ческий Центр­ли­зиб, байрамла аги-хIяйзиб ха­й­дакьла гIядат­ли­диубти ху­ре­­гуни дирнила устадешла дурс­ри детерхур.

Хайдакьла районна бекI ГIялим Темир­бу­латовли бурни хIясибли, даршдусмазир кадизурти гIядатуни миллатла культурала белхъхIебелхъуси бутIали детаурли сари.
«Хайдакьлантала саби-бегIси хасти гIяд­а­ту­начилси беркала бир­ни­ла уста­деш лерти сари. Нушала хурегуни – бекI­ли­би­уб­си сабабра саби дурала улкнала турис­ту­ни битIакIес багьандан. Ил дигесира са­би, сенкIун нушала халкьла хурег бирнила тя­хIяр-кьяйда цархIилти культурабала адамтас дебали гIяхI­дилзули сари», — викIи ил.
Балбуц ибхьули, этноцентрла директор Зубайдат ХIя­сановани даргала хуреглизир бекIлидиубти декьла, диъла ва ниъла берклуми дирниличила буриб. Хайдакьлантани гьаман дузахъути анкIила, хIяж­лан­кIила, мухъила, мучила, сусулла декь ди­рутири, сарира някъла урхамтачир делкьунти.
«Гьаларти дусмазир ва гьаннала манзил чуднани бекIлибиубси мер бурцули са­би. Хайдакьлантани илди 50-лицад жура­ла диру. Илала дурарад, дарганти-ургар тIинтI­­диубли сари: хинкIи, плов, чуду­хин­кIи, жура-журала соусуни. Хай­дакьланти бурсибиуб консерваби хIядурдирес, диъ буръахъес, чумал журала нусби дирес. Гьанна биалли хIушази чебиахъехIе секьяйда дирути­рил ил­ди хурегуни», — рикIи З.ХIя­са­но­ва, устадешла дарсличи ба­кIиб­та­чи дугьаризурли.
Гьала хили хIядурбарибси карилар чудни дирес бехIбихьиб. БахъхIи агарли диъбала, къабакъла ва кьарла чуднала тIем тIинтIбиуб.
Чудни дуцIули лералли, этноцентрла хIянчизартани гIяхIялдеш дирнила тяхIяр-кьяйда чедаахъиб. Илдани бурни хIясибли, гьалабла манзил гIяхIялдеш дарахъес живирусири гьарил шалгIевулхъуси адам, илала миллатличи я динничи хIерхIеили. Гьарил гIяхIял биалли вирхес вирусири хайдакьлантала сахаватдешличи, бизиси хурегличи ва дуги беркIес мер бирниличи. Хъа вегIли гIяхIяйс селизибадалра урехи ахIекIахъес халаси къай­гъибирусири.
ГIур фольклорла сценка гьалабихьиб. Илаб мекълис гьалаб бируси нятIуб (метIухь) хивала авруша бирнила тяхIяр чебаахъиб.
«Ил бирнила тяхIяр дебали къиянси саби. ТIутIила шиннизибад бируси саби буц­руб (патока) ва багьласи цIаличир 10 гидгари дархиути сари ил шалабиа­хъес, бахъхIи жургъбируси саби, ил бу­хъутI­би­ай­чи. ГIур биалли, халати журала хиви дархиути сари. ХIядурси нятIуб кьумурличи кабихьили мекъла бархIи цIикурлис арху. Ил муридешли мекъла лебил гIяхIлира балхути саби», — буриб З.ХIясановани.
Лебилра балбуцличи бакIибти гIяхIлас чудни, муридеш халбарес имканбакиб.
Районна администрацияла пресс-служба