ГIябдуряхIманова ЗулхIужат ГIябдул­ва­гьа­бовна Къа­ра­будагъкентла районна Губ­да­нила школализир 36 дусра-сера ру­зу­ли сари. Урус мезла ва литературала учи­тельницани, дурхIнази тамашала ми­салти гьаладирхьули, дарган мез дагьахъесра гIяхIцад къайгъни дакIу­ди­ру­ли сари.

ДурхIни руркънила шайчирси организаторра риънили, илала лебилра бузери дурхIнала дагьри им­цIа­дарес, бяркъличи бикахъес бяхIчиаиибси саби. Дарган мезла дурсри кадирхьули хIе­риалра, иш гьакIлизиб илини ГъурбукIила школализиб Дагъиста халкьла поэт А.ГIябдулманаповала творчестволис хасбарибси дарс кабихьес пикрибариб. Балбуцличи А.ГIябдулманаповара районна багьудила управлениела хIянчизартира жибарили, чедирти классунала дурхIнас дарган мезла дарс кабихьиб. БяхIлизи даршили лерри, поэтессала гIямрула бикьрумиван, Россияла ва Дагъиста поэтуначил касибти жура-журала суратуни. Илкьяйдали илала жузала стендра хIядурбарилри. Дарсла тема нешличила сабри. Рурсби жагали, гIядатла палтарли бегIбиублири. З.ГIяб­дуряхI­мановани гьарил жузличила сунела пикруми аргъахъиб. ДурхIнани «Дудешла айгъир» бикIуси жузлизибад «Неш чераргъахъая» бикIуси хабарличила чула пикруми дуриб, урус мезлира дарган мезлира нешлис хасдарибти назмурти делчIун, далуйти зайдухъахъун.
ДурхIнани ярга-яргали учительницала суалтас жавабти лугулри. Дигеслири, дурхIнани А.ГIябдулманаповала биографияличила ва творчестволичила балухIели. Дарс ахирличи биркухIели, сари поэтессара гъайрухъун, дурхIнала суалтас жавабтира чардатур. Ил дарслис А.ГIябдулманаповани ахъси кьимат кабатур.
ГIергъила бархIи З.ГIяб­дуряхI­­ма­но­ва­ни илгъуна дарс Губ­данила школализибра дура­беркIиб. Балбуц шадлихъла аги-хIяйзиб бетерхур. Лебтанилра А.ГIябдулманаповас баркалла багьахъур.