РФ-ла Пре­зи­дент В.Пу­тин­на хIук­му хIя­сиб­ли, 2019 ибил дус Рос­си­ялизиб театрла Дус биъни багьахъурли са­би. Улкала лерилра ре­гион­тазиб тяхIярли, Дагъис­тай­зиб­­ра де­кабрьла 13-личиб ил шад­­­лихъ­ван абхьиб.

Ил шадлихъла дазурбазиб ГI.Батирайла уличилси Даргала театрли декабрьла 14-личиб «ХIядурдикIухIели итдуги деб­кIес» бикIуси спектакльра чеби­ахъу.
Драматург Е.Хами­ду­ли­на­ни сценарий белкIунси са­­би Дагъис­та халкьла писа­тель ГI.Абу-Бакарла по­весть хIя­сиб­ли. Ре­жиссер-пос­та­нов­щик – В.Те­у­­важуков. ГI.Абу-Ба­карли повесть белкIунси саби ВатIа Че­бяхIси дергълизиб сархибси че­дибдеш 30 дус биънилис. Гьалабирхьулра спектакльла камси бухIнабуцра.
Сельсоветла председатель Ни­кIа-Ра­бадай (ДР-ла урибси гIяр­тист ХIясанкьади Рабада­нов) рахъхIи сунени ралуси Къарчигъала СибхIятлизи (ДР-ла рурибси гIяртистка Рашидат ИсмягIилова) монтажнику­нала бригадали баргибси се­кIайчила бурули сай. ХутIла ли­ния битIакIес багьандан тIал тIаш­батес кур укъухIели, илдани ванзализиб къачагъунани бархьбатурси мегьла тIакьа баргили саби. Илизир дуилри дявтазиб бургъули калунтани хъули дархьибти хIябмузан ка­гъурти.
НикIа-Рабадан Сиб­хIят­ли­зи иличила бурес къалабаикибси хIязлис ахIенри. СибхIятли мурулра кIел кIилизан уршира дявтази бархьибтири, амма илдазивад цалра чарухъунси ахIенри. ХIе­ра, СибхIятли 30 дус гьалар сол­датунани хъули дархьибти к­а­гъурти илдала нешанази, хьу­нрази, биштIатази даахъес кьасбарили сари. Илдас илди алхунти уршбачил, муйлачил, дудешуначил ихтилатли детаэс дирути сари…