Ишди бурхIназиб Мажалисла урга даражала цахIнабси багьудила школализир 7-ибти классуни-ур­габ «Нушани гьанбиркахъулра!» бикIуси бал­буц бетерхур. Ил ЧебяхIси Чедибдеш сар­­хибхIейчирад 75 дус дикнилис хас­ба­риб­си сабри.

Хайдакьла районна бекI ГIялим Темирбулатовли бусягIятла замана чеабиуси нас­лулис патриот бяркъ бедлугнила хIяракат мягIничебси биъниличила аргъахъиб.
«ДурхIнас хала дудешунала тарих балес гIягIниси саби. Лебилра Европализи душмантала кьялшуби чегибси замана, нушала халкьлис илис декIси бяхъ чегахъес, лайикьси даражаличир къарши­деш дарес имканбакIиб. Ил гьарил ургъан­на, зяхI­матчила, партизанна гьунар са­би. Нушаб чараагарси саби иличила гьан­бир­ка­хъес, ва хала дудешунала хIур­мат­бирес, чеал­кIуси наслулизира илдачи пах­­ру­би­рахъес», — цIакьбарили буриб ГI.Те­мир­булатовли.
Балбуц бетурхуси жаняхIлизиб «Дергъла дусмазиб алхунти гьанбиркахъули» бикIуси стендра балкьаахъурлири. Илар фронтовикунала суратуни ва кагъурти чедаэс вирулри. Илкьяйдали гьаладихьилри дергъла манзиллизир дурадухъунти газетабазирти макьалабира.
Цалабикибтала гьалар гъайрухъун­ школала директор Заира Сулайбановара. ЧебяхIси байрам сабаэс гьалаб бу­­чIантази гIулухъа игитуни-пар­ти­зан­та­чила, дергъла кьяркьти дусмазиб, халатачил барх, бургъули калунти уршби-рурсбачила бурес чараагарси биъниличила багьахъур илини.
«Илди дурхIнала дергъла ва бузерила гьунарличила хъумартес нушазиб ихтияр агара. Бургъантачил къяйли, чула гIямру ахIерахIедарили, илдани Чедибдеш гъамбарибси саби, ахIерси ванза багьандан бургъули, урехи, бугIярдеш ва гаши чекасили», — чеимцIабариб илини.
КIинайс лебилра цалабикибтани, минутлис лехIдеш багьахъурли, дергълизиб алхунтала хIурматбариб.