ЧебяхIси Чедибдеш 75 дус биънилис Ахъушала рай­он­на музейли халаси хIядур­деш бирули саби. Пикридарили сари гIяхIцад далдуцуни, районна учреждениебала хIянчизартачил, школабала бучIантачил дарх дурадеркIес. Гьарил шила администрацияличил, ВатIан багьандан бургъес арбякьунтала черкад дурусли баянти дагьес имканбакIиб.

— 1941 ибил дусла июньничибад 1945 ибил дусла мартличи бикайчи Ахъу­шала районнизибад 2941 адам дяв­тази жибарибтири. 1939-1940-ибти дус­мазибра гIяскуртазиб къуллукъбара­хъес районнизибад арбу­кибти жагьил адамти илдачи им­цIа­ба­ралли, абиркули саби 3478-личи. Илдазибад байхъалара хъули чарбухъунти ахIен, — бурули сари музейла директор Зубалжат Мирзаевани. — Бургъантала лу­гIи дурусли кабизахъес багьандан наб халаси кумекбариб дахъал дусма­зив районна военкоматлизив узули ка­лунси МяхIяммад МяхIяммадовли ва районна ЦБС-ла директор Жамиля ГIяб­дул­лаевани.
Гьалабван районна музейли, культурала, жагьилтала политикала ва туризмала управлениели Сталинград ба­гьанданси дяви таманбиубхIейчирад 77 дус дикнилис хасбарибси балбуц ду­раберкIиб. Илизир бутIакьяндеш да­риб «Ахъушала район» МО-ла бекI Мя­хIяч ГIябдулкаримовли, ДР-ла Миллатла музейла директор Пахрудин Мя­хIям­ма­довли, цархIилти жавабла хIян­чи­зартани, школабала учительтани ва бучIантани. Жибариб Сталинград багьанданси дявилизир бутIакьяндеш дарибтала гъамти адамтира.
Музейла директор З.Мирзаевани бу­риб, сецад цIакьси дяви кабикибсил Сталинград шагьар багьандан. Ил дяви­лизир азирти Советский бургъантани жан дедиб ВатIан, халкь, улкала челябкьла багьандан. Буриб чедаибти къиян-жапаличила, хьунул адамти, биш­тIати, бухънаби — дявтани чилра ахIера­хIейр­ниличила.
Ахъушала районнизибад 39 бургъан­ни ил дявилизир бутIакьяндеш дариб, ил­дазибад хъули чарбухъунти 8 саб­ри: Ахъушала шилизибадти ГIялихIяжи ГIяб­­дуллаев ва МяхIям­мад ГIябдуллаев, Бал­хъарла шилизибадти ГIиса ГIумаров ва ДибирхIяжи ГIябдуллаев, БурхIи­мякь­­­махьилизивадси Гъази­мяхIям­мад ГIяб­дул­лаев, Гьебала шилизивадси ХIяжи ХIяжиев, Уллучарализивадси Ра­ба­зан­хIя­жи ХIясанов ва Урхьучимахьилизивадси Мя­хIяммад Ражабов.
— Нушала чебла саби къиянти замунти хъумхIертес, гIяхIгъубзначила гьан­биркахъес, даршудеш калахъес ба­гьандан нушазибад лябкьуси барес, — викIи «Ахъушала район» МО-ла администрацияла бекI М.ГIябдулкаримов. — Ишдигъунти далдуцуни имцIали дурадеркIес, жагьилтази ЧебяхIси Ва­тIа дергъличила чебетаахъили бурес гIягI­нили саби.
Гьунибаъниличиб цархIилти хIянчи­зар­тира гъайбухъун, дурхIнани наз­мур­ти делчIун, балбуцла бутIакьянчиби музейли хIядурдарибти выставкабачил тянишбиуб.