Гьигьбируси гьава агъу­­­лабиънили, гIям­­­­ру арали хIе­­дуркI­­­­­­нили, зараллати берк-бержли нушала кьар­кьай­чи­­ де­бали вайси асар­би­ру­ли­ саби.

Халкьла изала че­хIей­­­­судеш гIяшси дара­жа­­ли­чи­б биънили, агъула се­кIул­ти ва­ шулки алкIули сари. Кьар­кьала ил­дазибад уму­ба­ри­ли сагъиэс багьандан тух­тур­­тачи дугьаизес гIягI­ни­бир­кур. Буралли, рес­пуб­ли­ка­­лизир медицинала уч­реж­де­­­ниеби дахъал сари. Ишар ну­­шала гъай детарар ара­деш гIяхIбулхъахъуси «Гар­мо­ния­» центрличила. Или­чила бакьиб­­хIели, сегъуна уч­реж­де­­­ние сабил чебаэс рякьунра. Центрла азбарла рухI­на­ру­хъун­хIели дайлаб фон­тан, жа­гати галгуби ва вава-кьар, цент­р­лизи арацIибхIели ша­ла­­ти ва умути хъулри. Уму­деш, дигалли азбарлабси, дигал­ли хъулразибси, итма­данал хIя­сиб­­бареслири. ЗягIип­ти ара­би­ахъес паргъат­дешла ва гIям­рула гIяхIти шуртIри акIа­хъуб­­лири: гьарзаси хIябдерхIла юрт, хIяжатти ваяхIли гIер­дуциб­т­и жагати хъулри, бассейн, гим­нас­­тикала зал, хIямам, ша­диб­гьуни бирахъес гьарзаси азбар. ЗягIипти шаласи ва уму­си ашханализиб хIябалра аргъ хурегли балхулри. Ил­дас хасси беркала бирули бузулри Кьур­бан-ПатIимат Мя­хIям­ма­дова ва илала рурси Мариям. Центр­ла хIянчизарти наб дяхI шалали гьунибаиб, бекI тухтур МяхIяммадрасул ХIя­­жиев­личил ихтилатбарира.
М.ХIяжиев центрлизив 10 дусичив имцIали бекI тухтурли узули сай. Ил мануальный те­рапевтра сай. Илини бурни хIя­­сибли, чула санигIят ункъли­ бяркъурти хIянчизарти са­би центр­лизиб бузути. Гьар зя­­­гIип­­­си­личи уркIецIичебси хIе­­­ру­ди би­ру, арадешличила хьар­хъар­би­кIар, хъули бархьайчи гIяхI­си къуллукъ гIеб­биа­хъу. Адамтас бегI­лара хIя­­жат­­сира илгу: чучи­ла пик­риикI­ни ва хIеруди бирни, хасли­ра, гIям­рула халати адамтас.
«Гармония» центр 2009-ибил дусличибад бузули саби. Илабти тухтуртани, зягIиптала арадеш гIяхIбухъахъес ва кьаркьала зараллати секIултазибад умубарес, гIядатла ахIенти тя­хIурти дурадуркIули саби. ХIи дузахънила, гьигьикIнила бир­кIантала, даргмахла, жихI ду­райънила ва нервабала цахI­набикла, къакъла ва бекIла ме­хIела, чакарла ва дахъал цар­хIил­ти излуми сагъдирули сари. Илкьяйда, машгьурси дяхънуша Надежда Семёновала методика хIя­сибли, варг умубирути процедураби дурадуркIули сари, ва илдани гIяхIти хIясилти чедиахъули сари.
Арадеш гIяхIбулхъахънила центрлизир кIел отделение дузули сари: терапияла ва нер­вабала излумала. Илар мас­саж, хиджама (кьаркьайзирти вайти хIи дурайули), бухъ­лухъуни кадалтули, бурбу­ни калтIули, шин агарли ва шин­на удиб къакъла чIала зуз­бирули, озонотерапияла, някъбала кумекличил (мануальная), тIабигIятла сурсатуни дармайс пайдаладирули (фи­зио­терапия) процедураби ду­ра­дуркIули сари. Центр, им­цIа­­ливан, машгьурбиубли саби шинна удиб къакъла чIала зузбирнила тяхIярличибли. Илабти тухтуртас, операция хIе­барили, къакъла чIалаличил дарх­дасунти гIяхIцад излуми сагъдарес имканбикIули саби, илдала лугIилизиб, къакъла чIалала лигубала дискани дурадухънира. Гьаннала замана адамтани бахъхIи кабиили гIям­­ру дуркIнила сабабли, чедир гьандушибти дискани гIи­ни­­дирули сари. Ил багьандан адамти къакъ изахъули или уркъбикIули саби. Ванати шинни къакъла чIалала гIемсни ва лапни хIярхIдулхъахъули сари ва зягIипси инжитхIеварили къакъла чIала гьамадли зузбарес имканбикIули саби.
ЗягIипси центрлизи кар­кьу­хIели, чинабалра къар­ши­хIе­биркуси рикIаслира хатIа бетхIерар, сенахIенну гьан­­налауб наб къаршибикибси ахIен, ахтардиирнила тяхIяр дура­буркIули саби – гемосканирование (темнопольный мик­­роскопличил хIила кIантI хIер­­барни). Илгъуна анализли, ит­маданал, зягIипсила кьар­кьайзибси агиличила ва гIур­лизир диргаладухъес асубирути излумачила белгибирули саби. Компьютерличибад хIила даражаличибли дулекIла ва урцецунала дузни, хIи микроэлементунани делкъни, изала чехIейсудешличила, чакар, холестирин, бактерияби, кесма, вирусуни, шулеркуни лерни кабилзахъули саби.
ЦагьатIи илаб наб гIяхI­би­зурси секIал – шинна урунж. Бурни хIясибли, илди дебали пайдалати сари ва Кавказла минеральный шинна курортунала машгьурти шиннис гIе­ла­дул­хъули ахIен. Шин даргмахла, дулекIла ва урцецунала излуми сагъдарес сабабли детарули сари.
Азбарлаб, илкьяйда, гIя­датла баркьудиличил дарх­хIе­дасунти къуллукъуни дарили зягIипти гIяхIси гьавличи биркахъуси декIарси юртра леб.
Ил центр сунела уличи тамай балбикибси саби. Илизир чедир гьандушибти лерилра секIал дархдалги сари: устадеш лерти хIянчизарти, гьаннала заманаличи далдикибти ара­вирнила тяхIяр-кьяйда ва гIямрула гIяхIти шуртIри акIахъ­ни. М.ХIяжиевла гъай хIя­сибли, центрлизи арадеш къу­лайбиахъес Дагъиста мер-му­сализибадцунра ахIи, Чечнялизибадра адамти башули саби. Сагъбиубти зягIиптани ле­билра хIянчизартас баркалла балахъули саби.
Центрлизиб бархIили кIел азир къуруш дедлугули вегIлис дигуцадхIи лечение бируси саби. Илала дурабадра, РФ-ла гражданинтас матъал медицинала кумекбирнила пачалихъла программала дазурбазиб «Гармония» МОЦ-ли республикала шагьуртазибад яра районна больницабазибад бархьибти зягIиптас хасси къуллукъ гIеббиахъуси саби. Ила кайхьес багьандан центрлизиб аравирни даимбарес хIяжатли саби ибси кагъар, полис ва выписка диэс гIягIнили сари.
Нушала гIямрулизиб арадеш бегIлара дурхъаси секIал саби. Иличил цугбуцеси селра лебси ахIен. Нуша аралихIели, иличи сегъуналра пикри бяхIчииули ахIенра. Амма ил нукьсанбикалли, цархIилти секIултала мягIна хIебирар. Ил багьандан арадеш мяхIкамли бихIес чебиркур. Арали гIямру дуркIеная, гьалмагъуни!