Дахадаевла районна администрацияла юртлизиб «Цаси Россия» 17 дус бирнила байрам дурабуркIнила дазурбазиб чула декIар-декIарти масъултачил дугьабилзути адамти кьабулбариб.
Халкьличилси гьунибаъни дураберкIиб муниципалитетла бекIла заместительти БяхIяммад МяхIяммадовли ва Рабазан НухIкьадиевли. Дугьабизуртала масъулти ункъли арзахъес илдас кумеклибиуб районна организациябала ва учреждениебала руководительтира.
«Адамти кьабулбирнила жумягI дураберкIибси саби гьалабван. Ил манзилла бухIнаб адамти чула челукьутачил дугьабилзутири. ЦархIилти мераначирван нушала районнизирра челукьути камдирули ахIен. Илдигъунтазирадли сари гьундури къулайдирни, газличил ва шинничил шими гIердурцни», — буриб Рабазан НухIкьадиевли.
Илкьяйдали дугьабилзутири адамти юртани дарахъес багьандан ванза декIарбарахъес, мер-муса къулайси агиличи душахъес ва хIянчиличи кьабулбарахъес.
Гьарил дугьаизурсила масъала ункъли хIербарибсири муниципалитетла бекIла заместительтани ва лайикьси тяхIярли ил арзахъес хъарбаркьуни дедибтири.
«ЦацахIели чула челукьутачила адамтани чизилра балахъули ахIен. Адамтас кьалли гIяхIил саби чула челукьутачил дугьавизеси мер биалли. Адамтас гIяхIил биахъес, чула зугIлумачила гъайикIухIели чучи лехIбилзути ва кумекбирес хIядурти лебниличила илдази аргъахъес хIяжатси саби нушани. Илала дурабадлира, адамтачил илдигъунти гьунибаъниби дурадуркIнили белгибирули саби нушани бегI гьалабси яргализиб се барес хIяжатлил», — багьахъур БяхIяммад МяхIяммадовли.
