пахрубирулра илдигъунти адамти нушачибра лебниличи

Ишди бурхIназиб халкьани-ургабси чулахъунала бархIи Хайдакьлизиб дураберкIиб, «Къиянси кьисматли заябарес хIебиубтала бархIи» тяхIярли.

Арадешлизир нукьсандешуни лерти учибикиб Мажалислизибси районна жамигIят гIеббурцуси Центрлизи. Ил бархIи илар чула миллатличи хасти бизити хурегуначил далкьаахъурлири столтира.
Ил балбуц ибхьули, районна культурала центрла заведующая­ Зоя Чупанова рикIар: «Чулахъунала БархIи — цIакьси уркIила гьавла бегIти, къиянси кьисматли бячIес хIебиубти гIяхIгъубзнала бар­хIи саби. Районнизиб илис хасбарибси балбуц дурабуркIули, ну­шани пахрубирулра илдигъунти адамти нушачибра лебниличи. Районна лебилра культурала хIянчизартала шайзирад илдас дул­гул­ра арати гIямру. Тухумтала ва хъалибаргунала хIерудили мур­тал­­­ра алавбуцаб саби».
Районна чулахъунала цалабяхъла председатель Шапи Сали­хIов­лира, дявтала ва бузерила ветерантала Советла председатель Зияутдин Кахрумановлира, сукъуртала цалабяхъла председательла заместитель Даит ГIябдулхаликьовлира бурни хIясибли, ил пергер байрам жамигIятлизи чулахъунала гIямруличи ва баркьудлумачи хаслира имцIали бяхIчиаахъес багьандан дурабуркIуси саби.
Байрамла ахирличиб районна культурала Центрла хIянчизартани чулахъуни гIяхIси концертличил разибариб.
Чула яргализиб арадешлизир нукьсандешуни лерти адамтани байрам дураберкIибтас ва саби гьар секIайзибад гIеббурцутас халаси баркалла багьахъур.