Гьалабван, «Дагъистан» РИА-лизиб ДР-ла пачалихъла хъулри ахтардидируси ор­га­низацияла руководитель ГIяли Жаб­ра­­гIи­лов­ла ва СМИ-бала вакилтала гьу­нибаъни бетерхур.

Балбуцличир 2019 ибил дуслизир ведомстволи дарибти хIянчурбала баянти каиб ГI.ЖабрагIиловли. Илини буриливан, ДР-ла хасси организацияли хъулри дал­дирниличи ва илдала бухIнабуцличи хIе­ру­ди гIеббурцуси саби. «Нушани гIяхIси да­ражала хъали-цIала гIяхIдешунани пай­да­ла­бикIахъес хIеруди бузахъуси саби. Иш­дус дахъал хъулрачилти юртаназиб хIербирути адамтачирад низам-кьяйда дуъниличил дархдасунти 4493 дугьабиз дакIили сари. ИмцIатигъунти МяхIячкъалализирад детарули сари, гIур Каспийсклизирад, Дербентлизирад… Илала дурабадра, ишдус 2669 хIукму дурасира, илдазирад 1676 буйрухъ гIямрулизир дурадеркIили сари, 993 далагардеш ункъдарили ахIен. Илди жагъалти судличи дархьибти сари», — викIи ведомствола руководитель.
Гьунибаъниличиб, илкьяйда, ГI.Жаб­ра­гIи­­ловли ДР-лизир лифтани дарсдарахъес ва далдарахъес арц декIардар­нили­чилара гьан­бушиб. «БусягIятла замана республика­ли­зир 1860 лифт дузули сари, илдазирад 529 лифтла замана каберхурли саби. Илди 25 дусла чеди дузахъес асубируси ахIен, ил ба­гьандан сагаси дуслизир дахъхIила лифтани сагатачи дарсдирути сари», — буриб илини.
Илкьяйда, ГI.ЖабрагIиловли адамтас жамигIятла инспектортала кьукьялизи каберхес имкан лебниличилара багьахъур. 2014 ибил дусличибад ведомстволизиб хасси институт бузули саби. Шел дусла бухIнаб 43 адам хъулри ахтардидирантили бетаурли саби.
ДР-ла ГЖИ-ли челябкьуси Сагаси Дусла байрамлис нукьсандешуни агарли бузахъес сурсатуначил халкь гIеббурцнила организациябази багьахъурли саби. «Эгер, зянкъдяхъили гIергъи, бехIемцIуни агардируси кабизли хIушала масъала бекIхIебарили биалли, ГЖИ-ла «буцIарси линия»-личи зянкъдяхъес дирудая. Ил дуги-хIерила бухIнаб бузуси саби, байрумтала заманара дежурный вируси сай. Илкьяйдали нушала сайтличи ва электронный почталичи дархьес дирудая дугьабизуни. Иличи че, ишдус, арадешлизиб нукьсандеш лебтас — мез хIедаланти, гIянцIаби ва хIярхIли би­кьути адамтас — «буцIарси линия» бузесаилра. Илала бузери бехIбихьибхIейчибадал 20-цад кагъар дакIили сари», — имцIабариб ГI.Жаб­­рагIиловли.
Ведомствола руководительла гъай хIя­сиб­ли, ЖКХ-ла гIяхIдешунани пайда­ла­бикI­нила даража гьалабичиб гьанна гIяхI­бу­хъи саби. БекIдешдирути компанияби ва халкьла хIяжатуни ихънила организацияби чула баркьудиличи чекадизурли дузескадиили сари.
Балбуцла дазурбазир, ведомствола руководительли журналистунала суалтас жавабти чардатур.