Хайдакьла районна дайлар, ДР-ла БекI В.Васильевла сипта хIя­сибли балкьаахъурси «Дила Дагъистан – дила шин» проект гIям­рулизиб бетурхахънила да­зурбазир, шинна проводуни дарс­дирнила хIянчи дурадур­кIу­ли сари.

Илди дехIдихьибхIейчирад ГIялисултIановла уличилси, бекIлибиубси арагIебли кьакьалала дубкадси, заябиубси шинна провод сагасиличи барсбариб, шин хъали-хъайгIи садукиб. Илдигъунти хIянчи дарили сари Мажалисла шила Сагаси микрорайонна, ЧебяхIси Мажалисла, ГIябдашка махьила кьакьурбазирра. Жигарчерли детурхули сари райцентрла убяхI къатIла кьакьурбазирра. ХIянчили лебилрара-сера ши алавбуцили саби. ХIянчизарти савлиличибад бархIиахъайчи бузули саби, дузесаили сари 10 трактор – экскаваторра, чулира шинна проводуни кадихьахъес чукълуми икъути.
Чедиб гьанбушибси проект гIямрулизиб дурабуркIули, шила духIнарти, 38 километрла бухъяндешла шинна проводуни дарсдарес пикрибарибси саби.
«Район шинничил гIеб­буцес багьандан гIяхIцад хIян­чи дарес хIяжатсири. Ва, дигесли саби, нушаб ахир­ра-ахир республикала мягI­ничерти проектуназибад ца гIям­рулизиб бетерхахъес им­кан­бакIниличи. Баркалла багьахъес дигулра­ республикалис бекIдешдирантас илгъуна имкан гибнилис. Нушани чихъли кьиматлабирулра ну­шала халкьлис дебали хIя­жат­ти масъулти ирзнилизиб икьа­лабирни. Лерилра хIянчи хъараурхIели, райцентрлизир сигдиубти турбаби кахIевлан, шинна лерилра проводуни са­гадарили дирар. Лябкьуси дуслизир илкьяйдали шин уму­дирути гIягIниахълуми тIаш­далта, илдала кумекличил халкь ахъси даражала шинничил гIеббуцес имканбикIур», — цIакьбарили буриб районна бекI ГI.Темирбулатовли.
Районна администрацияла
пресс-служба